Tekîn derheqê weçînayîşê 1’ê Teşrîne de ard ziwan ke no weçînayîş, weçînayîşekî asayî nîyo û wina domna: “No weçînayîş bin bandorê qirkerdişê Pirsûs, Enqere û Cizîrî ke hetê AKP û çeteyên AKPe ra amey viraştiş de mend. Rayna hemverê gerîlayan operasyonê girdî amey viraştiş, welatijê welatperwer û demokratî zî amey tepiştiş, çapemenî sero sansur û teda amey meşnayîş. Yanî weçînayîş nêy şert û mercan de amey viraştiş. Xora merdim nêşkeno vajo weçînayîş zî.”
Îradeyî nas nêkerdî
Tekîn dergeyîya qalîkerdişê xo de ciresna ke dîktatorîya Erdogan û AKPe îradeyo ke şarê ma 7’ê Hezîrane de nîşan da nas nêkerdî û wina vat: “Bi paştîya sermayeya mîyannetewî û dewletê Ewropaye îradeya şarî xesp kerd. Weçînayîşî sey nîşaneya demokrasîye yenî dîyîş, labelê kuralekî ke her weçînayîş bi awayo meşru bêro qebulkerdiş çin o. Xora xeylî kesê vînaker zî ardî ziwan ke weçînayîşê 1’ê Teşrîne mîyanê şert û mercê dij demokratîkî de virazyay. Hemverê nêy qirqerdişan xorayîrberdişî ameyî îlankerdiş. Cayo ke xorayîrberdiş te de ameyo îlankerdiş, sero bi awayo hovane hêrişî virazyayî. Senî ke weçînayîş şert û mercê asayî de nêbî, encamê ci zî asayî nîyo.”
AKP ravêreyey qedêna
Tekîn qalîkerdişê xo de bal ant ser bira bêçalakîtî ke vernîya weçînayîşî ameybî girewtiş û wina verdewam kerd: “Yeno zanayîş ke Erdoganî mutabakatê Dolmabahçeye qebul nêkerdbi û dîyalogê ke heta aye wext ameybî kerdiş zî înkar kerdbî. Dima zî vat bi ke persgirêka kurdî çina, persgirêka welatijanê kurdan esta. Bade bi provokasyonê ke Agirî û teqyayîşê ke mîtînga Amedî de virazya ravêreyey awayo fîîlî qedyay. Xora dima zî hêrişî bi awayo rêz û plankerde, bin vînayîşê polîs û lejkeran de ameyî kerdiş. Rayna 5’ê hezîrane ra heta nika ser Rayver Apoyî tecrîdekî girankerde yeno meşnayîş. Bade weçînayîşê 1’ê Teşrîne kombîyayîşê ewil de hukimata AKPe dîyar kerdo ke konsepta şerî heta wisarî do bêro domnayîş.”
ANF/BEHDÎNAN
Lazim o qet bêwayîr nêmanî
Tekîn qalîkerdişê xo de ard ziwan ke hukimata AKPe bi hêriş û qirkerdişan nîşan dayo ke do konsepta şerî de israr bikera û wina vat: “Rewşa inasarên de bêxra xoverdayîşî çî nêmaneno. Hêzê demokrasîye ya Tirkîyaye senî ke dijî faşîzma 12’ê Êlule xover day se, rayna dijî şero topyekun a Çîller, Gureş, Agar û dijî komploya mîyannetewî welatperwerê Kurdistan û mîlîtanê PKKe xover day se, dijî hêrişê AKPe zî do xover bidî. No semedî ra şarê Kurdistan û hêzê demokrasîye ya Tirkîyaye hemverê qirkerdişê Farqîn û Geverî bêveng nêmanî û warzî lingan ser. Kesê ke mîyanê pozîsyonê îxanetî de yî zî lazim o şarê ma ra xo bidî efukerdiş. Lazim o her kes dijî faşîzma AKPe bibo yew û xorayîrberdişan ra wayîr bivejyo.”