Qayûmo ke tayînê Şaredarîya Dêrsimî bîbî, merkezê cinîyan û Mudirîya Polîtîkayê Cinîyan ya Şaredarîye pada. Cinîyê Dêrsimî vera polîtîkayan de piştî danî yewbînan û sere nêronenî.Babete ser o esnafanê cinîyan ra Sultan Zencîdî, Perîhan Acare û Beser Taşe qisey kerdî.
Zencîdî destpêkê qiseykerdişê xo de va ‘ganî cinîyî piştî bidî yewbînan’ û wina domnaye: “20 serrî verê mi dest bi karê sûke kerde û ez dezgeyê xo de her tewir kincan roşena. Mi qet kar ra poşmanî nêant, çimkî kar seba cinîyan şert o. Wexto ke cinîyî piştî bidî yewbînan, eşkenî her çî bikerî.”
Komelî bêrî padayîş zî cinîyî piştî danî yewbînan
Acare wina va: “Wexto ke qayûm ame tayînkerdiş sere de heme komeleyê cinîyan pada. Azadîya cinî û payan ser de vindatişê cinîyan nîno hesabê înan. Komeleyê cinîyan bêrî padayîş zî cinîyî piştî danî yewbînan.”
Taşa ke sûka bajarî de dezge akena, wina qisey kerd: “Dezgeyê mi şenik o, cok ra ez nêeşkena zaf çîyan bîyara. Tay bibo zî ez eşkena hetkarî bida debara keyeyê xo. Şar û cîranan ra nêbîyêne ez do nêeşkayêne esnafî bikera.”
DÎHABER/DERSIM