Girotxaneyan de dûştê tepişteyanê dawa PKK û PAJK binlingkerdişê heqan resyayê merhaleyê îşkence. Ser nameyê tepişteyan Denîz Kaya damûstayîneke da û hayr ant zilmê girotxaneyan ser, dûştê nê kerdenan vengê tekoşîn da.
Konseptê herb yê îxtidara AKP ser girotxaneyan de zî tesîr keno. Girotxaneyan de dûştê tepişteyan êrişê kêfî û giranî roj bi roj benê jêde. Denîz Kaya vist vîrî ke ‘Planê Qirkerdenê Kurdan’ yê AKP ke aşma Tîrmeha 2015î ra vistî dewre her ke şina bena hera. Kaya da zonayen ke AKP ya ke dûştê xoverdayişê xorayîrberdişan yê Cizîr, Sûr û Nisêbîn û verra hemleya şoreşger yê gerîlayan vindî kerd wehşet û zorvajî de sînoran nêsilasnena, her ca de erzena şarê ma ser û înfazan virazena.
Zindan jû linga konseptê êrişan o
Kaya da zonayene ke linga esasî yê no konsetî polîtîkayê zîndanî yê û wina va: “AKP bi polîtîkayanê sirgûn, îşkence û zextî kerdenanê dûştê mordemî de sînoran nêsilasnena. Dewleta qirkerdox yê AKP, kesê ke teber dê nêşkena înfaz bikero ebe tepiştiş, ebe bêrûmetkerdişî hewl dana tesfîye bikero.
Sirgûn, wextê sirgûnkerdişî de îşkence, ferzkerdişê îtirafcitî, polîtîkayê xoserkerdişî, geyrayişê viranî, kelepçeyê cotî û kerdişê sewbînî êrişê dûştê kamîya sîyasî yê tepişteyanê sîyasî yê.” Kaya wextê amelîyatkerdişê Rizgar Tûranî de ala tirkan napayişî, eştişê hucre yê Ergîn Aktaş ke qolê ci çinîyê zey nimûneyê verçiman da.
‘Ganî kes bêveng nêmano’
Denîz Kaya aşkere kerd ke iyê dê dûştê sîyaseta înkar û îmha yê zîndanan kamîya sîyasî yê xo ra tawîz nêdê û dûştê nê kerdenanê bêqanûnî yê AKP vengê berzkerdişê tekoşîn da sazgehanê heremî û mavên netewî. Kaya da zonayene ke dûştê nê kerdenanê kêfî yê îdareyanê girotxaneyan ê dê heta 14ê Tîrmeh serpirodayişê CPT, Rêxistina Efû, Wezarêta Edalet, Komîsyonê Meclîsî, TT û Baroyanê Heremî bikerê.
Kaya veng da malbatanê tepişteyan ke dûştê nê polîtîkayanê îxtidar bêveng nêmanê, gerreyê sûcî bikerê û wina va: “Ganî bîro zonayene ke zey tepişteyê PKK û PAJK ma dê dûştê polîtîkayanê înkar xover bidê û ala azadî yê Kemal, Sara û Semayan her tim berz bikerê.
DÎHA/AMED
Osmanîye çarnîyayo navendê îşkence
25 tepişteyê ke girotxaneyê Mêrdîn ra sirgûnê girotxaneyê Osmanîye bî rixmo ke dirbetinîyê nînê derkankerden û raştê îşkence û heqaretanê lejker û gardîyanan amey.
Girotxaneyê girote yê Osmanîye Tîpê T 2 ke tim û tim eve binlingkerdişê heqan ra rî bi rî yo de tepiştey bin îşkence de yê. 77 kesê ke Nisêbîn de eve îşkence amey tepiştiş ra 25ê ci sirgûnê girotxaneyê Osmanîye bî. 25 kesê ke dirbetinîyê nînê tedawîkerden. Pawitoxê heqê mordeman ke wazenê tepişteyan re zonayişî bigîrê raştê manîkerdişê kêfî yê îdareyê girotxaneyan yenê.
Malbatê ke girotxane de eve tepişteyan ra dîyayiş viraştî day zonayene ke 25 tepişteyanê dirbetin ra 23ê ci eynî qoxişî de manenê. Goreyê zonayişanê malbatan tepişteyan ra Osman Bozkûrt’î di çimê xo kerdê vinî û çend cayanê ganê xo ra dirbetin o. Malbatan day zonayene ke rixmo ke rewşê xêlê tepişteyan giran o, la tepişteyî nînê derman kerdene. Goreyê vatenan îdareyê girotxane pêrokîn heqê sosyal yê tepişteyan birnayo û wextê sewqê nêweşxane de tepiştey raştê heqaret û îşkenceyê lejker û gardîyanan ameyê.
Îşkenceyê fizîkî û psîkolojîk
Temsîlkarê ÎHD yê Osmanîye Necmettîn Ozkan’î ard zon ke girotxaneyê Osmanîye çarnîyayo navendê binlingkerdişê heqan û va rewşê tepişteyan zaf giran o, la nêhewadayenê nêweşxane. Ozkan’î vist vîrî ke tepiştey wextê şîyîn û ameyîşê nêweşxane de raştê îşkenceyan yenê û wina va: “Nika girotxane de zî îşkence û derbî estê. Him îşkenceyê fizîkî, him zî psîkolojîk esto. Îdareyê girotxane heqanê tepişteyan destê ci ra giroto. Ma derheqê tepişteyan de xeber girotişê zonayişan de zehmetî ancenê. Îdareyê girotxane zonayişî nêdanê.”
Ozkan’î waşt ke ganî desinde tepişteyê dirbetinî bîrê dermankerden û îşkence biqedîyo û veng da raya pêroyî ke dûştê na rewşî bikewê hereket.
DÎHA/OSMANÎYE