Raştiye de hukumatê AKP Kenan Evren ra zaf rajî bî û rajî yo. AKP 11 serrî yo serdest a. Verva darba 1980 hukumatê RTE destê xo pêt nêguret û hora nêwast zî. Çike Evren bi qanunê bingehin Leyîranê xorê mêresode rind peyde verdayî bî. Leyîr zî nika na qut wenê, coka jede vengê xo nêvezenê.
Na mavên de darbekarê darbeyêke nêbî, jê “Ay Işigi, Balyoz û Ergenekon” pêro mehkeme bî û ceza gurete. Rindke nî qetilkaran ceza gurete. Nî kewt bî gonya kurdan, hama mehkemede qalê kurdan qe nêbî. Onca zî rindke nî general, esker û sîvîlê qetîlkarî nika hepis derê.
Lewê naye de wayîrê muhtira 27ê nîsanê yê serra 2007 bêceza mendî. Leyîr Evren bi wayîrê muhtira 2007 Yaşar Buyukanit ra Dolmabahçe de ameyî têlewe, desinde ameyî hure. Leyîr Evren bi haletade girse hevalê xo Yaşar Buyukanit rusna taqawitiye. Leyîr Evren tayîne de ame hure, taye zî estî hepisxanan.
Hama her çî ra avê, Leyîr Evren serdestiya xo bingê darba 1980 sero nêro. Hata ewro na darbe ra beno weyiye. Honake hukumat nêbî, vatenê, “ez ke bîne serdest bendê weçînîtîşî dan waro. 11 serrî yo serdest o, na derheq de gamê nêeste. Coka Evren rê dûwa keno û vano “zovîna îstîkrarê dugele beno xirave.”
Tabî, qanunê bingehin yê Kenan Evren de xêle qanunê bînî estê û leyîr Evren hata ewro nî zî nêvurnê.
Nika haştiye sero qesey beno, muzakere sero qesey beno, la Leyîr Evren hona zî dest bi qanunanê Kenan Evren ra nênano. Seweta haştiye 8 asmiyo qeyta jû gama heyayîye nêesta. Mehkumê nêweşî hona peyê dêsan derê. Taye mehkumî nêweşî erjînê hucre.
Reyna vajîne, Leyîr Evren kurdan ra vano, “bêrê teslîm bê!”
Niyadê hefto peyen se vano: “Mi paketa xo yê demokratîk kerdene qedenê. Rozanê verva ma ken eskera. Pakete de taye surprîzî estê. Pakete de seweta zonê dayikan de perverde tewa çîno. Na mesela ma nika nêceme rojdemê xo. Ma, AKP, çiyêke dugela ma kenê leteyî, na derheq de game nêerzeme. Ma hora îmkanê musayena zonê dayikan mekteban de ardê ca. Eke verê zonê dayikan de perverde ra bo, zono resmî zerar vîneno.”
Pekî, nî gamîke nêerjiyayî haştiye çitur bena? Haştiya Osmanî bena. Osmanî de dêkûdolabî nêqedînê.
Pî ke çitur bî, laz zî hen yo. Pî, Evren bî kokim, leyîr Evren mêresê ey sero raya xo rameno.