Dozgerîya Riha, Leyla Guvene zî tede derheqê 35 kesan de qerarê bêteqîbîye dabi la no qerar vurna. Dozgerî îdîayî nêvurnayî û taleb kerd ke na dolime dawa bêro akerdene.
Serra 2017’î de, seba ke beşdarê aktîvîteya roja pîrozbîyayîşê Rayberê Şarê Kurdî Abdullah Ocalanî bîyê, Hemsereka KCD’yî Leyla Guvene, waya Abdullah Ocalanî Fatma û birayê ci Mehmet Ocalan zî tede, derheqê 35 kesan de tehqîqat amebi akerdene û peyê cû qerarê dewa ame girewtene.
Qerarê bêteqîbîye ra 2 serrî dima reyna dewa ameye akerdene. Dewa hetê Dozger Ozkan Gîrgînî ra ameyebî akerdene û 9’ê Çele de reyna eynî dozgerî qerarê bêteqîbîye dabi ci.
Reyna eynî dozgerî 20 roje peyê cû, roja 1’ê Sibate de, îdîa û delîlî nêvurnayî û qerarê xo yê verî vurna, waşt ke derheqê Leyla Guvene û kesanê binan de dawa bêro akerdene û seka nê 35 kesan 1 serre ra heta 5 serran cezayî bêrê dayene.
Îdîaname hetê Mehkemeya Cezaya Girane ya 10’ine ya Riha ra ame qebulkerdene. Mahkeme roja 27’ê Adare de bî û Leyla Guvene seba ke grevê vêşanîye de ya nêeşkîya beşdarê mehkeme bibo û derheqê ci de “qerarê bi zorardişi” ame girewtene. Avukatan va seba ke bêteqîbîye nêameya berzkerdene û dawa ameya akerdene îtîraz kerd la mehkeme îtîraz qebul nêkerd.
MERKEZÊ XEBERAN