Waya Leyla Guvene Kadin Ote derheqê çalakîya Guvene de va ‘Leylê hertim qerardar a, peynîye de merg zî bibo, aye nêagêrena’ û wina dewam kerde: “Seba mi herkes Leylê yo. Gelo herkes nêyî nêvîneno? Ciwanî grev de yî. Wa herkes destê xo dergê ma bikero.”
ZEMO AGGOZ / MA / ANQARA
Rayberê Şarê Kurdî Abdullah Ocalanî ser o tecrîdêko giran esto û no tecrîd bi taybetî serranê peyênan de açarîyayo îzolasyonêk, cuye, ewleyî û weşîya Ocalanî tehluke de yî. Kurd û dostê kurdan seba ke tecrîd wedarîyo, çalakîyanê tewir bi tewiran virazenî.
Vera tecrîdî de Parlamentere û Hemsereka KCDyî Leyla Guvene grevê vêşanîye dabî destpêkerdene û çalakîya Guvene roja 198. de dewam kena. Çalakîya Nasir Yagizî zî roja 185, çalakîya hepsîyan 160, çalakîya Îmam Şîş û 14 çalakwananê Strasbourgî roja 159, çalakîya Yûsûf Îba 133, çalakîya Fadîle Toke zî roja 125. de ya. Hepsîyan ra 2 grûbê ke pêro pîya 30 kesî çalakîya xo açarnabî rojeyê mergî, çalakîya grûba yewine zî roja 25. de domîyena.
Waya Leyla Guvene Kadin Ote derheqê cuyayîş, xoverdayîş û rewşa Guvene de qisey kerde. Kadin Ote bano ke Guvene tede ameya dinya nîşan da û wina va: “Leylê no ban de ameye dinya û no mekteb de wende. Leylê seba ma zaf qîymetin a û ma ya ra zaf hes kenî. Ma pîya bîyî pîl. Ma pîya şîyêne zozanan û mêşnayî dotênê. Leylê zaf hetkarîyedayîşî ra hes kerdêne. 1992 de Konya de dest bi sîyasetî kerd. O wext ra nata mîyanê xebatanê partîye de ca gêna. Leylê cinîyêka cesure ya, vera ti kesî de sere nêronena.”
Dayîka mi Leylê nêdî û merde
Waye Ote daye zanayene ke aye grev ra nata tena reyêk şênayo şêra zîyaretê Guvene û wina va: “Ez 5 rojî hetê waya xo de menda. Waya mi ne şêna beşdarê cenazeya pîyê xo bibo, ne zî ya maya xo bibo. Pîyê mi o wext 7 aşmî erd de mend, labelê Leylê zîndan de bî. Dayîka mi zî 3 serrî erd de mende. Wexto ke dayîka mi merde, Leylê reyna zîndan de bî. Dayîka mi mergê xo ra ver tena vatêne ‘Mi Leylê nêdî’ û vatişê aye yo peyên zî no bi.”
Heta mergî qerardar a
Waye Ote bale ante qerardarîya Guvene ser û wina va: “Leylê hertim qerardar a, peynîye de merg zî bibo, aye nêagêrena. Ma zî zaf xemgîn benî. Lazimîya nê welatî bi aştîye esta. Dayîkê ke 20 serrî yo domanê înan vînîbîyaye yî, estî. Kesê ke Ewropa de yî û hesretîya welatê xo yî, estî. Êdî bes o, wa çareserî bêro. Gelo do heta kura wina dewam bikero? Wa herkes bêro têhet. Seba mi herkes Leylê yo. Gelo herkes nêyî nêvîneno? Ciwanî grev de yî. Wa herkes destê xo dergê ma bikero.”
Eke grev biqedîyo, ez do şêra hetê aye
Waye Ote veng da herkesî ke wa herkes berpirsîyarîya xo bîyaro ca. Ote va ‘ez pawe ya ke wa waştişê Guvene û hepsîyanê bînan bêro bica’ û wina qedênaye: “Eke waştişê înan bêro qebulkerdene û grev biqedîyo, ez do ewil şêra hetê waya xo. Êdî ez nêşena telefon de zî waya xo reyde qisey bikera. Tena ez eşkena warezaya xo Sabîha ra melumat bigîra. Her ke ez gêrena, mi ra vanî rewşa aye krîtîk a. Çim û goşê ma paweyê xeberêka xêrin de yî.”