Piştî ku bi hezaran mirov hatin windakirin û qetilkirin, an li tenişta rêyekê, an li dolekê, an jî li rûbarek û qilaçekî hatin definkirin. Heta niha herî zêde li Bedlîsê gorê komî hatin dîtin. Tê zanîn ku li Bedlîsê nêzî 300 gorên komî hene. Li Bedlîsê yek bi yek gorên komî ronî dibin û derdikevin holê. Niha jî li ser şahidî û çavdêriya welatiyan 2 gora komî ya jê 3 sivîl 12 kesan hate dîtin. Li ser şahidiya welatiyan li geliyê Bedlîsê 2 gorên komî hate dîtin. Gorek komî 20 û gorek komî jî 25. kîlometre dûrî navenda Bedlîsê ye. Şahidan, diyar kir ku gorek li tenişta Xana Kefendûrê ye û aydî 3 welatiyên sivîl e. Şahidan, da zanîn ku gora din jî 5 kîlometre li ser geliyê Bedlîsê li duriyana Qeşemêrgê ya Pira Zengilê ye û aydî 9 endamên PKK’ê ye.

‘3 welatî li ser rêya  Mûşê kuştin û defin kirin’
Şahidê cerdevan ku ji ber ewlehiya xwe navê xwe neda, serî li nûnertiya ÎHD’ê ya Bedlîsê da û cihê gorên komî bi nûnerê ÎHD’ê yê Bedlîsê Hasan Ceylan re parve kir. Şahidê bûyerê, diyar kir ku di sala 1994’an de li ser rêya Mûşê li nêzî Xana Kefendurê panzêrek leşkerî 3 cenazeyên sivîlan anîn li wir veşartin. Şahid, anî ziman ku panzêra leşkerî 3 welatiyên sivîl avêtin çalê û çû û wiha çavdêriyên xwe anîn ziman: “Piştî ku panzêr çû ez çûm ser cenazeyan. Min dît ku 3 welatiyên sivîl ên bi cilên bedil (qat/takim) hatine kuştin. Pişt re me bi derfetên xwe ax avêt ser wan û em hatin. Hate gotin ku 3 kes girtiyên siyasî yên Girtîgeha Mûşê bûn.

‘Gora din jî aydî 9 endamên PKK’ê ye’
Gora din a komî jî 25 kîlometre dûrî navenda Bedlîsê li ser Geliyê Bedlîsê li duriyana Pira Zengilê a Qeşemêrgê ye. Şahidê bûyerê Seyîthan Kara jî der barê gorê de serî li nûnerê ÎHD’ê Hasan Ceylan da û diyar kir ku di vê gorê de 9 endamên PKK’ê bi komî hatine definkirin. Nûnerê ÎHD’ê yê Bedlîsê Hasan Ceylan jî anî ziman ku li gorî serlêdanê 9 endamên PKK’ê di salên 1992-93’an de di kemînê de jiyana xwe ji dest dane û bi komî hatine definkirin. Ceyhan, anî ziman ku di demê dawî de malbatên ji Nîsêbînê hatine serî li wan dane û li ser serlêdanan serî li Dozgeriya Komarê ya Bedlîsê dane.


SALİH SERTKAL - DÎHA-BEDLÎS