Qezaya Amedî ya Licê ra girêdaye dewa Mişrefî de vizêr şewe, leşkeran helîkopter ra gule dewijan ser de varnayî. Leşkeran rayîrê dewe girewtî û dewe de 'qedexeyê tebervejyayîşê kuçeyan' ame îlankerdiş. Dewijan ser medyaya komelkî ra hetkarîye waşt. Ame aşkerekerdiş ke dewe de 3 kesî birîndar bîyî. Semedo ke walî destûr nêda ambûlansî şêrî dewe, birîndarî rasteyê dewe de ameyî vindarnayîş.
Badê ke hedîse ame eşnawitiş, saetêk ra dima birîndar neqlê nêweşxaneyî ameyî kerdiş. Birîndaro bi nameyê Munîr Serîn rayîr de qelbê ey vindeto û bi masajê qelbî ameyo hişê xo ser. Birîndaro dîyin Celal Yildirim zî pîyê ey ameyo tepiştiş. Halê birîndaro hîrêyin ra zî ti xebere nêameye girewtiş û ame musayîş ke ci berdê Nêweşxaneyê Dewlete yê Licê.
Heto bîn ra ame musayîş ke leşkeran eşto keyeyanê dewijan ser û îşkence bi dewijan kerdo. Tîya de îşkence bi camêrdan ameyo kerdiş û cinî û domanî zî bi erdî ra ameyî dergkerdiş. Walîtîye îdîa kerde ke 'merde û birîndarî çin î' la tayê dewijan dîyar kerde ke beno ke hûmara birîndaran zêde biba. Dewijan dîyar kerd ke kewtiş û vejîyayîşê dewe ameyo qedexekerdiş. Rayîrê dewe hetê leşker û qoricîyan ra ameyo padayîş û ame zanayîş ke destûr nêdîyeno kesê ke seba roşanî şîyî meymanîya dewijan, tepîya biagêrî.
AMED