Herb vinet, hukumat û dewleta tirkî nêvinetî. Hukumatê AKP seweta devamê herbî destabera xo ke çi ame kerd û kenê. Çike ecdadê cira bije hata Reecep Tayyîp Erdogan nî haştiye ra hasnêkenê û nêwazenê.

Nî qeyta hetkarê haştiye nêbî û nêbenê. Eke nî rastî haştiye biwazê, seweta qetlîamêke ecdadê nînan û nînan bi xo virastê, mexduran ra leborîne wazenê. La hata ewro nê kesî nînan ra tam hesav pers kerd, ne kî nî bi tarîxê xo ameyî têrî. Dewleta tirkî ermenî qirkerdî hesav nêda, asurî-suryanî qirkerdî hesav nêda, kurdî qirkerdî û kena hesav nêda û nêdana, alevî qirkerdî hesav nêda.
Dewleta kolonyalîste seweta haştiye hata ewro qeyta jû game nêeste.
Zerrê nî 15 asmanê peyenan de bi kistena Medenî Yildirim, Mehmet Reşît Îşbîlîr, Veysel Îşbîlîr, Bêmal Tokçu, Ramazan Baran, Hacî Bakî Akdemîr û Ramazan Ertaş 7 însanê kurdî hetê polîs û eskeranê AKP ra ameyî qetil kerdene.
Yanî ‘demê haştiye’ de kî Recep Tayyîp Erdoganî gonî risnê. Erdogan beno sa û vano ‘cenazeyî nînê.’ Zelal vano ke ‘cenazê eskeran nînê, yê kurdan kî honde muhîm niyê.’
Hukumatê AKP ke kewt tenge ‘çaliştay’ virazeno. Ebi nî ‘çaliştayan’ pê miletî xapneno.
Çi hêyf ke siyasetvanê kurdî, taye roştberî û akademîkerî yenê têhet qesanê tipûtol yê Beşîr Atalay gosdanê. Dima kî vanê ‘çiyo newe çîne bî.’ Eke hen yo sima ça sonê nî çaliştayan? Hata nika seweta aleviyan, aşiqan û kurdan ‘çaliştayî’ virastî.
La ‘çaliştayan’ ra dima halê aleviyan, aşiqan û kurdan hebena bî xirabin. Alevî tek tek yenê kistenê, wastîsê xo nînê qebul kerdene. Hata ewro qeyta jû mesela aşiqan kî halnêbiya. Kurd kî devam ra yenê kistenê.
En peyecoy kî Lîce de bi qetil kerdena Ramazan Baran û Haci Bakî Akdemîr ‘demê haştiye’ ame qertil kerdene. Haştiya dewleta AKP niya ra.
Lîce de gencê kurdî hetê eskeranê Akp ra kişînê, hometa tirkî derdê desmale gureto. Sawoke desmala tirkan weşiya gencanê kurdan ra muhîm a. Onca çapemeniya tirkî hebe mendo ke rîwalê ronayerna jû desmale ra herbê dîna îlan bikero. Recep Tayyîp Erdogan onca vano “kam beno bibo, eskeranê ma gune çi ke lazimo bikerdenê.” Yanî eskeranê xora vano, “sima î gencêke desmala na ro, gune bikistenê.”
Taye şari a desmale ra hasnêkenê, çîke a desmale bi gonya ermeniyan, asuriyan, kurdan û aleviyan ama surkerdene. Hata ke nî şaran û îtîqatan heqê xoyêke sima qesp kerdê, peyser nêguretî, a desmale de bi haştiye nêciwiyenê.
Provakasiyonêke benê, bi vengdayîsê serek provakator Erdoganî benê. O veng dano, nijadperestê tirkî kurdan lînç kenê.