Badê ke Mutabakatê Dolmabahçe hetê Erdoganî ra ame red kerdene, 24ê Temmuza 2015î konseptê şerî kewtbî dewre. Rayberê Şarê Kurdî Abdullah Ocalanî ke heta nika bi vervînayîşanê xo vernîya rayîrî akerdbî, no het de zî analîzê muhîmî kerdbî. Ocalanî 9 serrî verê ra roja ma ya ewroyî dîbi û hişyarîyê muhîmî kerdbî. NUJIYAN RIZGAR ANF/BRUKSEL Badê ke Serekkomar Erdoganî Mutabakatê Dolmabahçe red kerdbî, 24ê Temmuza 2015î de artêşa tirkî bi 400 teyarayê şerî hêrişê Warê Pawitişê Medya kerdbî û o wext ra nata lobîya şerî ya taybete dewre de ya. Ewro 3 serrê prosesê şerî temam bi û na lobîye her ke şono Tirkîya ver bi krîzêko kûr beno. Sey her wextî, Rayberê Şarê Kurdî Abdullah Ocalanî nê prosesî verê ra dîbi û hişyar kerdbî. Ocalanî analîzê xo yê 9 serrî verê de wina vatbi: “AKP Ergenekonê xo awan keno. Ganî merdim fam bikero. AKP lobîya xo awan keno. Na lobîya şerî ya. Nê lobîyî zere û teber de, burokrasî de, huqûq de û artêş de estî û destek vînenî. Eke lobîyê şerî aver şêrî, AKP nêşêno vernîya înan de bivindero. Ez nika ra hişyar kena.” Reyna Ocalanî analîzêkê xo yê bîn de zî wina vatbi: “Ez dibare vana, eke problemê kurdî bi hawayo demokratîke çareser nêbo, lobîyê şerî kewenî dewre. Nê lobîyî yê teberî reyde kewenî têkilîye mîyan û donemê komployî dest pêkenî. O wext her kes vînî keno. Ez çîyêko winasî tercîh nêkena. Ez wazena bi rayîrê demokratîkan problem çareser bikera.” Ocalan felsefeya qanûnan zaf baş zano Wexto ke Rayberê Şarê Kurdî Abdullah Ocalanî 9 serrî verê vatbi ‘AKP do lobîya şerî awan bikero’ kesêk nê vatişî zaf fam nêkerdbî. Labelê ewro rijnayîş û serubinbîyayîşê ewroyî ra ma heme çî fam kenî. No nuşte de armancê ma çimê Ocalanî ra wendişê raştîya şerî yo. Çimkî Ocalan felsefeya qanûnan zaf baş zano. Cok ra Ocalanî heta nika heme analîzê xo de qala aştîye kerda. Badê ke prosesê çareserîye ame qedênayene, konseptê şerî erzîya dewre. Hukmatî bi manaya ‘ray bi ma nêdana qezenç kerdene’ maseya çareserîye qelibna. Ocalanî 5ê Nîsana 2014î de heyetê HDPyî ra vatbî “Beno ke no ameyîşê şima yo peyên bo. Beno ke şima êdî nêrî tîya. Çimkî nêyî hende cîddî nîyî.” Eke AKP bibo otorîter, xo bi xo qedêneno Labelê no hişyarkerdişê sifteyîne nêbi. Ocalanî 27ê Sibate de zî vatbi “Eke AKP biwazo bibo otorîter, o wext xo bi xo qedêneno. Eke AKP wina nêkero, o wext do gerîla şer bido dest pêkerdene. Peymane çin a, çareserî çin a, aştîye çin a. Eke faşîzm bêro ferz kerdene, o wext şer dest pêkeno.” Mekanîkê derbe ke Ocalanî qala ci kerdbî, şewa 15ê Temmuze kewtbî dewre. KCKyî zî îzehetêk dabî û vatbî ‘24ê Temmuze do sey şaşîyêka tewr girde derbazê tarîxî bibo’. Çîyo ke Ocalanî tewr baş şîrove kerdo, raştîya fenomenê tirkîtîye ke çi şêno şer bikero û çi zî aştîye bikero yo. Rolo ke Modernîteya Kapîtalîstî seba ci dîyar kerdo, cendirmetîye û gardîyanî ya. Herçiqas ke wina yo zî Ocalan vera şer û aştîye de bêhêvî nîyo. Çareserîya Ocalanî zî wina ya: “Ma ancax vera îstîsmar û îqtîdarêko winasî de bi xoverdayîş û edalet derbaz bikerî. Rayîrê bînî ti netîce nêdanî.”