Serokê YPK’ê Nîmet Ebdullah bal kişand ser giringiya kongereya Cenevre 2 û wiha got: “Beşdarbûna Kurdan di her kongreyekî navneteweyî û cîhanê de, karekî pir pêwîst e. Ev jî pirsa Kurdan têxe nava bernameya wan welat an jî peymanan. Di kongreya Sewrê de behsa Kurdan hat kirin, çend maddeyên taybet li ser kuran hebûn. Lê mixabin ev di kongreya Lozanê de hatin hilweşandin. Niha hewlekî pir xirab li holê heye ku dixwazin Kurd wekî şandekî serbixwe beşdarî kongreya Cenevre 2 nebin û bên paşguh xistin.” Ebdullah diyar kir ku paşguhxistina Kurdan di kongreya Cenevre 2 de tê wateya binpêkirina mafê Kurdan û wiha pêdeçû: “Ji bo wekî dosyeyekî serbixwe behsa pirsa Kurdan neyê kirin. Ev jî metirsîdar e. Lewra pêwîste Kurd li rojava, Kurdistan û derveyî welat hewl bidin ku bi her awayekî Kurd bi şandekî serbixwe beşdar bibin.”
Derbarê hinek partî û kesayetiyên Kurd ên di nava mûxalifeta Sûriyê de beşdarî kongreya Cenevre 2 dibin de jî serokê YPK’ê Nîmet Ebdullah wiha got: “Ez bi ti awayî ne li benda wê yekême mûxalifeta Sûriyê ji bo Kurdan ti tiştekê bike. Rêzdariyên min ji bo wan hene, lê Kurdên di nava wê mûxalifetê de, mûxalifet xwediyê çi dîtinê ne; ew jî xwediyê heman dîtinê ne. Ti bandora wan jî nîne, lê ger Kurd şandekî serbixwe bin wê bi bandor bin.”


Ti cudahiya wê ji Lozanê tune ye
Parêzer û parlamenterê berê yê parlamentoya Herêma Kurdistanê Serdar Herkî jî li ser kongreya Cenevre 2 wiha got: “Em hêvîdarin kongreya Cenevre bikare çareseriyekê ji bo pirsgirêkên Sûriyê bibîne. Dîtina me ew e Kurd bikarin wekî aliyekî serekî û wekî Kurd beşdar bibin. Ji bo bikarin daxwazên rewa yên gelê Kurd bigihînin wê kongreyê û ji bo çareseriyekê ji bo doza Kurd li rojava bibînin.”
Herkî dilgiraniya xwe li ser venexwendina Kurdan a bi şandekî serbixwe nîşan da û wiha got: “Bi baweriya min ev planekî navneteweyiye, destê hinek dewletên navçe û cîhanê li pişt vê biryarê heye. Ti cûdahiya vê kongreyê ji kongreya Lozanê tune ye. Beşdarbûna Kurdan a ligel mûxalifetê ti berhemekî wê tune ye, ji ber ew mûxalifet nûnertiya gelê Kurd nake.”
Parêzer û endamê Desteya Bilind a YPK’ê Kerîm Biradost jî, bal kişand ser rol û beşdarbûna Kurdan a di kongreya Cenevre 2 de û wiha dîtinên xwe anî ziman: “Gelek hewldan hene ku nehêlin Kurd wekî şandekî serbixwe beşdarî kongreyê bibin. Armanca vê jî jinavbirina rewşa niha li Rojava derketî holê ye. Lê madem vîna gelê me bihêze û di pratîkê de xwedî hêz e, ez di wê baweriyê de me nikarin wê rastiyê paşguh bixin. Em hêvîdarin ew kongre wekî ya Lozanê lê neyê û dîrok carekî din xedrê li Kurdan neke.”
Biradost, li ser beşdarbûna hinek aliyên Kurdî di nava mûxalifeta Sûriyê de jî dîtinên xwe anî ziman û wiha dawî li axaftinên xwe anî: “Mixabin heta niha mûxalifeta Sûriyê ti helwestekî eşkere li ser Kurdan nîşan nedaye û îtiraf bi rêveberiya demkî ya li Rojava nekiriye. Ev jî zengilekî metirsîdar e. Kesên di nava mûxalifetê de nûnertiya Kurdan dikin û bêyî ti ajandeyeke wê mûxalifetê ji bo Kurdan hebe, wê karînên wan jî wekî yên wan Kurdên di kongreya Lozanê de beşdar bûne be.”

DÎHA/HEWLÊR