Serekîya Dayîreyê Xurtkerdişê Ekonomîya Herêmî ya Şaredarîya Bajarê Girdî yê Amedî, çarçeweya “Projeya Kizvanêran ra Peydakerdişê Fistiqêre” de Qezayê Amedî Pasur, Pîran û Licê sey cayo pîlot vijna û ê cayan de xebatanê xo domnena.

Hîrê qezayan de do 10 hezar kizvanêrî (menengiç ağacı) bêrê lulkerdiş. Na çarçewa de ekîbanê şaredarî, Taxanê Qezaya Pasurî Firkê, Duderya, Bahanda, Helîn, Kanîka û Benin de 14 hezar û 500 lulî dîyê 2 hezar 168 kizvanêran ro. Lulê ke dîyayê daran ro se ra 90ê ci girewtî la semedo ke hemwelatî weş miqateyê daran nêbîyê no nîsbet kewt se ra 70.


6 taxan de 2 hezar 168 dar

Xebatê lulkerdişê daran yê ekîbanê Serekîya Dayîreyê Xurtkerdişê Ekonomîya Herêmî bê mabên dewam kenê û dekewtişê taxê ke tede darî ameyê lulkerdiş de lewhayê ke ser o “Na taxe de çarçeweya averberdişê falîyetanê zîret û heywankarî de hetê Şaredarîya Bajarê Girdî yê Amedî ra xebata Kizvanêran ra Peydakerdişê Fistiqêre bena.” nuşte yê ameyî aliqnayîş.

Mudira Şaxa Xurtkerdişê Zîret û Heywankarî ya Serekîya Dayîreyê Xurtkerdişê Ekonomîya Herêmî Gulbahar Bozarslan Tunçe derheqê xebatan de zanayîş da û wina va “ Serra 2016 de teberê bajarî de “Projeya Kizvanêran ra Peydakerdişê Fistiqêre” dest pêkerd.  Na çarçewa de 6 taxanê Qezaya Pasurî de xebate bena. 6 taxan de 14 hezar û 500 lulî dîyayê 2 hezar 168 qinazêran ro. Ma bi na xebate kenê ke wa şarê ma yo ke tîya de ciwîyeno peyser abigêro keye, dewe û taxanê xo û xo tîya de mird bikero. Seke yeno zanayîş qezencê fitiqan zêde yo. Şarê tîyayî waştêne ke darê ke tîya de yê bêrê lulkerdiş. Hetê dewijan ra taleb zêde yo. Ma zî aşma Hezîrane de dest bi kar kerd. Lulê ke ma dayê daran ro se ra 90ê înan girewt. La semedo ke şarê tîyayî weş miqateyê daran nêbî se ra 20 zayîyat ame meydan. Nika m ana xebate de se ra 70 serkewtê.”


Eke darî bibê pîl hîna zêde mehsul danê 

Tunçe îzah kerd ke wexto ke qinazêrî yenê lulkerdiş encex 3 serran ra pey mehsul danê û wina dewam kerd “Mehsulo ewilin qasê 5 kîlo yo.  La wexto ke darî benê pîl mehsulî zî benê zêde û 10 serran ra pey her dare qasê 30 û 50 kîlo mehsul dana. Eke berardiş zêde bibo Pasur û Amed de sanayîbîyayîş zî xurt beno. Lazim o lulkerdişî ra 15 aşmî ver darî bêrê terişnayîş (budama). Wexto ke darî bêrê terişnayîş daran de gilê neweyî vejîyenê. Wexto ke gilê neweyî bibê des aşmin dima ra wextê lulkerdişî yeno.” 


 AMED