Çalakîya grevê vêşanî ya Nurîye Gulmene û Semîh Ozakçayî roja 157. de dewam kena. Nurîye û Semîh bi waştişê Mehkemeya Heqê Merdiman ya Ewropa (AÎHM) neqlê nêweşxaneyî bîbî û goreyê raporê nêweşxaneyî nika Nêweşxaneyê Zîndanê Sîncanî de odeyêk de girîyayî binê tecrîdî.Babete ser o Avûkatanê Nurîye û Semîhî ra Dîdem Unsale qisey kerde.
Unsale va ‘Nurîye û Semîh teberê îradeya xo de nêweşxane de yenî vindarnayîş’ û wina domnaye: “Beno ke bi zorî mudaxaleyê înan bikerî. Ê nêşênî bi hawayo normal pêvînayîşê xo bikerî. Sey nêweşêk nêweşxane de pêvînayîş kerdêne. Ê her tim vanî ma nêweş nîyî, xoverdakar î. Rojêk de 8-10 rey karmend û doktorî şonî hetê înan û pers kenî ‘gelo şima cuyenî an nê’. Seba ke kesê înan ra biewnîyo çin o, lazimîyanê xo bi xo kenî. Fekê her diyan de birînî vejîyayî. Ê bi xo cilanê xo şiwenî. Seba ke tîje nêvînenî, goşt û adaleyê înan hîna rew helîyenî.”
Wazenî biagêrî
Unsale dewamê qiseykerdişê xo de wina va: “Ma her tim bi hawayo perîyodîk tehlîyeya înan wazenî. Labelê eke tehlîye nêbî, ê bi xo zî wazenî biagêrî zîndan. Nêweşxane de tecrîdêko giran ser înan de esto û nika zî wazenî avûkatan asteng bikerî. Rewşa Nurîye û Semîhî her ke şona hîna giran bena. Îdareyê zîndanî ser keyeyê înan de seba ke fek grevî ra vera bidî, zextan kenî. Her çiqas ke ma muracatê AÎHMî kerd, reyna zî ma AÎHMî baş şinasnenî. Ma AÎHMî qetlîyamanê Sûr û Cizîrî ra zanî. Cok ra zaf hêvîya ma AÎHMî ra çin a. Netîce ancax bi xoverdayîş yeno girewtiş. Qerarê AÎHMî huqûqî nîyo, sîyasî yo; AÎHM mehkemeya emperyalîzmî ya û hetê olîgarşî de ca gêna. Şar her roje wayîrê înan vejîyeno. Ez veng dana her kesî wa wayîrê înan bivejîyo.”
ŞÛJIN/ANQARA