KENAN KIRKAYA / MA/ANQARA
Seke yeno zanayîş çend rojî verê grûbêka faşîste Golbaşiya Anqara de hêrişê merasîmê cenazeya dayîka Aysel Tugluke Hatun Tugluke kerdbîye û destûr nêdaybî ke cenaze bêro definkerdiş.
Parlamenterê HDPyî yê Anqara Sirri Sureyya Onderî zî şahidîya nê hêrişî kerdbî û tesîrê nê hêrişî de mendbî. Babete ser o Onderî qisey kerd.
Onderî va ‘no hedîse reya sifteyîne nîno cuyayîş’ û wina dewam kerd: “Herkes sey ke no hedîse reya sifteyîne ya ke beno, hereket kenî. Mi zî wina hereket kerd. Labelê wexto ke merdim tayê fikirîyeno, vîneno ke vîyarteyo nêzik çîyanê winasîyan reyde pirr o. Tena merdim Dayîka Taybete, cenazeya ke dolaba cemedî de ameye vindarnayîş, cenazeya ke pey panzerî de ameye kirantiş û sewbîna bîyaro vîrê xo, bes o.”
Ma nêşenî teslîmê na barbarî bikerî
Onderî va ‘seba ke cenaze erey mende, definbîyayîş zî erey kewt’ û wina domna: “Sifteyîn mi va qey nê kesî seba oxirkerdişê cenazeye ameyî, labelê dima ra ma dî ke nengî çînayî. Verê cû kesêkî nengî çînayêne. Mi zî va înan ê kesî seba provokasyonî erşawitî. Wexto ke ez şîya hetê ci, mi dî ke grûbêka 15-20 kesan ra pê yena. Ma da yewbînan ro, polîsî kewtî mabênê ma, labelê înan dûr nêkerd. Her ke şîyêne hûmare û nengî zêde bîyêne. Aysel Tugluke va ‘ma nêşenî dayîka xo teslîmê na barbarî bikerî, ganî ma vejî û bierşawî herra xo’. Dima ra Wezîrê Karê Zereyî ame, labelê keye waşt ke cenaze bîşêro Kurdistan.”
Onderî peynîya qiseykerdişê xo de va ‘çîyêk mi rê hende giran nêamebî’ û wina qedêna: “Tarîxê nê welatî de Sêwaz, Gurgum, Dêrsim, Çorum û sewbîna estî. Eke ma bitersî û xo tepîya biancî, o wext nêverdanî ma keyeyê xo ra bivejyî. Cok ra ma bêhêvî nîyî. 3 kesî wina bifikiryî, eşkenî tarîtîya 300 hezar kesan vila bikerî.”