Padîyayîşê dezgeyê çapemenîye ser o xebatkarê Dîhaber, Şûjin û Rojeva Medya qisey kerdî û vera padîyayîşê rojname û ajansan de reaksîyonê xo nîşan dayî.
Muxabîrê Dîhaberî Ozgur Paksoyî va ‘ma temsîlkarê çapemenîya azade yî’ û wina dewam kerd: “Dîhaber şert û mercê giranan de awan bîbî û wextê OHALî de bi seyan ajans, kovare û rojnameyî ameyî padayîş. Keyepelê ma 15 reyan ame padayîş û xebatkarê ma wextê taqîbê xeberan de raştê hêrişan ameyî. Ma wextê qedexeyan de bîyî vengê Cizîr, Sûr, Gever, Nisêbîn û sewbîna. Labelê reyna zî ma hewl da karê xo bikerî. Ma do nuştişê raştîyan bidomnî û raştîyan tarîtî de nêverdî. Ma do bibî vengê kesê ke ma ra ver nuştbîy û tepîya game nêerzî.”
Tehamulê xoverdayîşê cinîyan nêkerdî
Edîtora Rojnameyê Şûjinî Ceren Karlidage zî dîyar kerde ke ê çapemenîya ke ziwanê camêrdî esas gêna serûbin kerdî û ziwanêko alternatîf awan kerdî. Karlidage wina domnaye: “Seba ke ma kerdişanê AKPyî teşhîr kerd, ma polîtîkayanê cezanêkerdişî yê îqtîdarî nuşt û zîhnîyeto ke cinî teberê cuye de verdayêne aşkere kerd, ma hedef ameyî girewtiş. Vera nêyî de ma şaş nêbîy. Xora her roje ma hedef de bîy. Demê peyênan de ma xeberanê xo ver tim hedef de bîy. Şûjin Nurîye Gulmene yo, Nujîyan Erhane yo, Denîz Firate yo, Guldunya û Elvana ke Amed de ameye qetilkerdiş o. Şûjin pêroyîya hêzê cinîyan o. Ma nê rejîmî baş şinasnenî. Ma do nê qîrayîşî bidomnî.”
Ma do cayêkê mendî ra bidomnî
Wayîrê îmtîyazî yê Rojnameyê Rojeva Medya Murat Sekmenî zî va ‘Rojnameyê Rojeva Medya ser mîrasê Azadîya Welatî de şîyêne û no het de kar kerdêne’ û wina dewam kerd: “Cayê Azadîya Welatî cîya yo. Rojnameyê ma vernîya asîmîlasyonî de berpirsîyarîyêka girde reyde xebetîyayêne. Her hîrê sazî û dezgeyî zî netîceyê konseptêkî de ameyî padayîş. Dewlete wazena vengê kurdan bibirna û ê sazî û dezgeyî zî vera nêyî de vindetî. Ma do cayêko mendî ra dewam bikerî.”
ANF/AMED