ELŞÎN GABAR / JINNEWS/ŞENGAL
Çeteyê DAIŞî 3ê Tebaxa 2014î de hêrişê Şengalî kerdbî û bi seyan êzidîyî qetil kerdbî û bi hezaran êzidîyî zî hêrişî ver mecbûr mendbî ke koç bikerî. Êzidîyê ke koç kerdbî, hertim bêrîkerdişê agêrayîşî reyde cuyayî û no het de qet hêvîya xo vînî nêkerdî.
Herçiqas ke hedîse ser o 3 serrî derbaz bîyî, reyna zî şarî heme zehmetîyan derbaz kerdî û dest bi agêrayîşê Şengalî kerdî.
Nê êzidîyan ra yewe zî cinîya bi nameyê Nîam Xudêda ya. Nîam Xudêda ferman de keye û erdê xo veradana û koçê yewna ca kena. Nîam Xudêda nê rojan de agêraye Şengal. Babete ser o Nîam Xudêdaye qisey kerde. Nîam Xudêdaye va ‘seba ke ma agêrayî erdê xo ser, ez zaf kêfweş a’ û wina dewam kerde: “Ma kampan de şert û mercê tewr zehmetinan de cuyayî. Ma bi rojan bêawe û vêşan mendî. Labelê nika ma erdê xo ser de yî. Ez nêşena kêfweşîya xo bîyara ziwan.”
PKK ame hetkarîya ma
Nîame Xudêdaye dewamê qiseykerdişê xo de dîyar kerde ke badê ke talebê kurdan yê xoserîye bî, nika tehdîtê hêrişê dewletanê bînan ma ser de estî û wina va: “Ma her roje derheqê bîyayîşê hêrişan de xeberan gênî. Labelê se beno wa bibo, ma do erdê xo nêteriknî. Erdê xo ser de cuyayîş, hîna rûmetin o. Ma verê cû zî fermanê çeteyan reyde têrî mendbî. O wext zî PKK amebî hetkarîya ma. Ez hêvî kena ke PKK û Rayber Apo do serbikewî. Ma bi saya felsefeya Rayber Apoyî de azad bîyî. Cok ra tena waştişêkî mi esto; o zî azadîya Rayber Apoyî yo.