Fermandaranê HPGyî ra Ahmet Bagokî derheqê Serrgêra 3. ya 3ê Tebaxe roja ke çeteyanê DAIŞî hêrişê Şengalî kerdbî de qisey kerd û wina va: “Ma saya şehîdê ke Şengal de dayî, ma Şengal rizgar kerd.”
3ê Tebaxa 2014î de çeteyanê DAIŞî hêrişê Şengalî kerdî û bi seyan êzidîyan qetil kerdî, bi hezaran cinîyan remnayî û bi deshezaran êzidîyî zî hêrişan ver mecbûr mendî ke ca û warê xo veradî û koç bikerî. Êzidîyî hêrişê 3ê Tebaxe sey Fermano 73. name kenî.
Babete ser o Fermandaranê HPGyî ra Ahmet Bagoko ke roja sifteyîne ra şîyo hetkarîya êzidîyan û heta ewro ewja de pawitişê Şengalî de ca gêno, qisey kerd.
Gerîla Bagokî destpêkê qiseykerdişê xo de embazê xo yê ke xoverdayîş de şehîd kewtî biminet yad kerd û wina va: “Ma o wext serê sibayî xebera hêrişî girewt û ma tam nêzanayêne. Pêşmergeyê ke pawitişê Şengalî ra wezîfedar bîy, êzidîyan fermanî reyde têrî verdaybî û remaybî. Hêrsê embazanê ma vera nê îxanetî de zaf gird bî. Cok ra zaf embazan waştênê ke şêrî Şengal. Ma zaf Şengalî nêşinasnayêne, labelê sozê ma o bî ke ma şêrî û Şengal bipawî. Wexto ke ma ameyî tîya ma trajedîyêk reyde têrî mendî.”
PDK nêverda verê şêrî
Bagokî dewamê qiseykerdişê xo de va ‘tevgerê ma waşt verê cû hêzêk bierşawo Şengal, labelê hêzê tîya vatbî lazimî çin a û nêverdaybî’ û wina dewam kerd: “Labelê wexto ke DAIŞî hêriş kerd pêşmergeyî guleyêk daxî panênaybî û remaybî. Cok ra bi seyan merdimî ameyî qurbankerdiş. Hîna ma nêameybî hêzê YPGyî mabênê Şengal û Rojawanî de korîdorêk akerdbî. Reyna şarê Rojawanî zaf hetkarîya şarê Şengalî kerdbî. Wextêk korîdor ame padayîş, ma hetkarîya sîlehan waşt, labelê PDKyijan qebul nêkerd. Ge-ge hetkarîya sîleh dîyayêne pêşmergeyan, labelê ê zî şer nêkerdêne. Ê eşîretanê êzidîyan reyde peyman viraştêne. Problemê ma yê cephaneyî estbî, wextêk dima ma fermandarîyêka ortaxe awan kerd. Dima ra ma vera çeteyan de hemleyêk da destpêkerdiş û na hemle 11 aşmî dewam kerd. PDK tim mîyanê îxanetî de bî. Ma ewja de xeylê embazanê xo yê erjîyayeyan şehîd da.”
Şerm nêkerdênê poz dayênê
Bagokî va ‘wexto ke merkezê Şengalî azad kerd, Serekê PDKyî Mesud Barzanîyî şerm nêkerdêne, pişta xo dayêne Şengal û vejîyayêne kamerayan ver’ û wina qedêna: “Barzanîyî dîyar kerdêne ke Şengal de tena pêşmergeyî estî, labelê ti kes bawerîya bide nêardêne. Çimkî ewja de tim ma şer kerdêne. Heta ke şarê êzidî ser de tehlukeya qirkerdişî bibo, PKK do ewja de bibo. Hîna 20 dewê êzidîyan destê çeteyan de bîy. Embazanê ma waştênê ke nê dewan rizgar bikerî, labelê PDK nêverdayêne. Dima ra nê dewî ameyî girewtiş. Reyna bi nameyê Pêşmergeyê Rojî 3ê Adara 2017î de reyna îxanet kerdî û xeylê embazanê ma şehîd kerdî. Ma do destûr nêdî ke pîsatîya xo ewja de nîşan bidî. Waştênê na rey heme êzidîyan orte ra wedarnî. Hedefê ma gird o û wezîfeyê ma nêqedîyayo.”
ROJNEWS/ŞENGAL