Komelê Îslamî yê Kurdistanî (CÎK) derheqê serrgêra 4. ya Qetlîyamê Şengalî de îzehetêko nuştekî da û bale ant Yewîya Neteweyî ya Kurdistanî ser.
CÎKî îzehetê xo de dîyar kerdo ke Qetlîyamê Şengalî serrgêra xo ya çarinî pir keno û no qetlîyam do qet vîrê şarê ma ra nêşêro. CÎKî dewamê îzehetê xo de wina vato: “Êzidîyî kokê şarê ma yî û ferman ra derbazbîyayîşê êzidîyan yeno manaya qelênayîşê şarê ma. Dagîrkerî seba ke nêyî bikerî, heme amadekarîyê xo kerdî û çeteyanê xo yê barbaran eştî dewre.”
CÎKî dewamê îzehetê xo de qala tesdîqkerdişê hêzanê mîyanneteweyîyan kerdo û wina domnayo: “Heme tewir hovîtîye kerdî û no het de tesdîqê hêzanê mîyanneteweyîyan zî girewtî. Tayê qehremanê kurdan nê qetlîyamî veng vetî û nêyî nîşanê heme dinya dayî. Qehremanan mesajê ‘şima çiqas hovîtîye kenî, bikerî, şima nêşênî vera xoverdayîşê ma yê heqdarî de aver şêrî’.”
Ganî ma yewîya xo awan bikerî
CÎKî îzehetê xo wina qedênayo: “Seba ke miletê ma yewna rey Şengal, Efrîn, Kobanê, Sûr, Cizîr, Helebçe û Mehabadan nêcuyo, ganî yewîya xo awan bikero. Ganî bi êzidî, elewî, musluman û heme dîn, mezheb, lehçe û cîyayîyê bînî dormeyê doza neteweyî de bêrî têhet û bibî yewe. Ancax ma wina eşkenî ferman û qetlîyaman bivindarnî. Eke ma yewîya xo awan bikerî û bipawî, ma eşkenî vera nê hovîtîyan de bivinderî. Reyna ganî ma yewbînan ra hes bikerî û yewbînan bipawî. Ma sere de Qetlîyamê Şengalî û heme qetlîyamanê bînan şermizar kenî. Ma şehîdanê xo rê rehma Homayî, birîndaran rê şîfa û şarê xo yê êzidî rê zî sabir wazenî.”
n MERKEZÊ XEBERAN