Çalakîya grevê vêşanî ya Nurîye Gulmene û Semîh Ozakçayê ke seba agêrayîşê karê xo daybî destpêkerdiş, roja 199. de dewam kena. Her di çalakgerî 122 rojî yo ke zîndan de yî û rewşa înan her ke şona hîna xirabêr bena.
14ê êlule de mehkemeya Gulmene û Ozakçayî ameye dîyayîş û çalakgerî veranêdîyayî. Mehkeme ra 2 rojî verê avûkatê ke amadekarîya pawitişî kerdênê, ameybî tepiştiş û ê avûkatan ra 14 kesî tewqîf bîyî.
Avûkate Nîlgun Ozkana ke şîye zîyaretê Gulmene û Ozakçayî, qisey kerde û hîsê Gulmene û Ozakçayî yê tewqîfbîyayîşê avûkatan ser o vînayîşê xo arde ziwan.
Ozkane va ‘Gulmene û Ozakça hêvî nêkerdênê ke hende avûkatî tewqîf bibî’ û wina dewam kerde: “Ê paweyê roniştişê doza dîyine yî, çimkî wazenî bivejyî mehkeme. Pawitişê her dîyan zî amade yo. No het de motîvasyonê înan berz o. Seba ke reya bîne nêvejîyaye mehkeme xemgîn î.”
Ozkane qala rewşa Gulmene û Ozakçayî zî kerde û wina va: “Her di zî meşîyayîş de zehmetî ancênê. Labelê moralê înan baş o. Bêxera dejê ke girêdayeyê helîyayîşê edaleyan, rincanî û kemîbîyayîşê kîloye, rewşa înan de çîyêko cîya çin o.”
Heqê pawitişî raştê hêrişî ame
Derheqê tepişîyayîşê avûkatan de avûkat Gokmen Yeşîlî zî va ‘seba ke nê 16 avûkatî avûkatîya Nurîye Gulmene û Semîh Ozakçayî kerdî, ameyî tewqîfkerdiş’ û wina dewam kerd: “Seba ke rayapêroyî wayîrê çalakîya Gulmene û Ozakçayî vejîyeno, meqamê îdarî nêyî ra eciz î. Dosyaya avûkatan de bi hawayo şênber çîyêk çin o. Yeno vatiş ke avûkatê Buroyê Huqûqî yê Şarî ser nameyê rêxistine suc kerdî, labelê nê sucî çî yî, nêameyî vatiş. Xora qeraro ke ameyo dayîş sîyasî yo. Ma dozgerî ra zî va ‘dosyayêka huqûqî vera şima de çin a, hêrişêko sîyasî û zextî estî. Dosyayêkî ardî vernîya şima, ganî şima bi sebebanê winasîyan avûkatan tewqîf nêkerî’. Na bêhuqûqî do zirar bida şima ro zî.
Meslekê ma yeno sucdarkerdiş
Yeşîlî va ‘seba ke avûkatan karê xo kerdî, ameyî tewqîfkerdiş’ û wina domna: “Avûkatan ra persê sey ‘çira şima avûkatîya Berkîn Elvanî kerd?’, ‘Çira şima avûkatîya Nurîye û Semîhî kenî?’ameyî perskerdiş. Heme sucdarkerdişî derheqê meslekê avûkatîye reyde eleqeder î.”
MA/ANQARA-STENBOL