HDP 25ê Temmuze de, badê kombîyayîşê koma partîya xo Amed de dest pê çalakîya “Nobeta Wicdan û Edaletî” kerdî. Çalakîya ke bin ablûqaya polîsan de ramena, raştê eleqeyê gird yê Kurdistanijan yena. “Nobeta Xoverdayîşî” do heta 31’ê Temmuze dewam bikero. Amed ra dima zî do na çalakî Stenbol, Wan û Îzmîr de dewam bikero. “Nobeta Xoverdayîşî” ra dima zî do çalakîyê HDP heta 4ê Mijdare biramê.
Hemseroka Pêroyî yê HDP Serpîl Kemalbay ke şî zîyaretê çalakî û derheqê “Nobeta Xoverdayîşî” de qisey kerd aşkere kerd ke iyê dê bi xoverdayîşî faşîzmî biqedînê. Kemalbay vist vîrî ke weçînayîşanê 7'ê Hezîrane ra dima û bi hewldayena derbeya 15'ê Temmuze ra îqtîdara AKP prosesê "sazîkerdişê faşîzmî” da destpêkerdiş û ard ziwan ke kerdenê AKP yê nikayî netîceyê na prosesî yê.
‘Seba wicdanan ma nobet de yê’
Serpîl Kemalbay aşkere kerd ke înan seba cewabhe prosesê derbeya sîyasî bidê dest pê “Nobeta Wicdan û Edaletî” kerdo û wina dewam kerd: “Ma 7'ê Hezîrane de îqtîdar vist. Îradeyê şarî ke 7'ê Hezîrane de vejya orte, çinî ame hesibnayîş. A roje ra na het îdareyêko kêfî rameno. Hewldayîşê derbeya 15'ê Temmuze zî açarnay firsetêkî û bi OHAL’î ra zî prosesê "sazîkerdişê faşîzmî” day dest pêkerdiş. Bi referandûmê 16'ê Nîsane ke rewa nîyo ra û bi vûrnayîşê Qanûna Bingehîn faşîzmê heta hetî peyda kerdî.”
Kemalbay veng da pêro şarê Tirkîyayî û kesê ke no şiyayîşî ra îtîrazê ci estê, na rewşî bidê vindernayîş û seba nayî zî waşt ke têkoşîn bîro berzkerdiş.
‘Vera împaratoriya tersî cesaret’
Hemseroka Pêroyî yê HDP Kemalbay hayr ant bêhuqûqîyê ke Tirkîya de benê ser û vist vîrî ke huqûq xoser nîya. Kemalbay da zanayîş ke tena bi cesaretkerdişî şeno vera împaratoriya tersî bîro vindernayîş.
Kemalbay hayr ant “Nobeta Wicdan û Edaletî” ser do zî û ablûqaya polîsan rê nêrazîbîyayîş damûsna. Kemalbay, vist vîrî ke wazenê bi ablûqa nobet manî bikerê û wina dewam kerd: “Ganî ma vera faşîzmî bibê yew û têkoşîn bikerê. Beno ke fikrê ma zeypê nêbo la hinî no rejîmê Erdogan-Bahçelî, rejîmê mîlîtarîst, netewperest de kes ewlehî de nîyo. Ganî ma vera nayî de xover bidê. Ganî Rojawayê welat destê xo bido destê Amedî.”
‘Cesaret axûkiştişê faşîzmî yo’
Kemalbay, vist vîrî ke nezdîyê 5 hezar partiyî bi hawayê teberê huqûqî rehîn ameyê girewtiş û hêrîşê nasnameyê parlamenterîyê wekîlanê HDP yeno kerdiş. Kemalbay, da zanayîş ke Amed ra dima iyê dê Stenbol, Wan û Îzmîr de zî nobet bigîrê û wina dewam kerd: “Nobetanê yew aşmî ra dima ma dê amadekarîyê mîtîngan bikerê. Ganî na seba ma bibo hemleya rêxistinbîyayîşî. Ma dê kêber bi kêber bigeyrê. Ganî herkes bi cesaret barê no prosesî bido ser paştîya xo. Cesaret axûkiştişê faşîzmî yo. Ma vanê bicesaret bibê.
Kemalbay aşkere kerd ke Anqara ra heta Stenbol destûrê meşî esto, la tiya de gameke zî yena manîkerdiş. Rojawa de OHAL, Kurdistan de rayverîya awarte esto û va, çîyê ke ewro qewimyenê formatêko bîn ê derbeya 12'ê Îlone yê.
‘Vera faşîzmî xûrtkerdişê têkoşîne’
Hemseroka Pêroyî yê HDP Serpîl Kemalbay vist vîrî ke AKP bi no halî welatî kirêşeno ver bi kendalî û qiseyanê xo bi nê vatenan qedêna: “Ganî seba rijnayîşê faşîzmî ma têkoşîn bikerê. Hewcedarîyê ma bi rayverînêka ke haştî kena malê civakî, seba her kesî edalet pawena esta. Ganî kes nêkewo pey xeyalanê 2019'î û nika ra vera faşîzmî seba berzkerdişê têkoşîn hereket bikero. Wa kes vera waştenanê şarê kurd ê azadî û demokrasî bi kodanê statukoperest fikir nêkero. Wa bi demokrasî biewno seserra 21îne. Ma dê seba ameyoxa ortax dest bidê yewbînî û têkoşîn bikerê.”
AMED