Çalakîya Nobeta Wijdan û Edaletî ke hetê 12 parlamenteranê HDP 1ê Tebaxe de Stenbol de Parka Yogûrtçû de destpêkerd, ramena. Çalakî vizêr roja diyîne de raştê elexqeyê gird amê. Partîyanê zey CHP, OSP û muslumananê antî-kapîtalîstî seba paştîdayîşî şî zîyaretê HDPyijan.
Nobeta Wijdan û Edaletî ke Amed ra dima dewrê Stenbolî bî, bi slogana ‘Ma nêvinderî, Vajî Bivindere, Ma dê Faşîzmî Bivindarnî’ roja 3. de Parka Yogûrtçû yê Stenbolî de ramena. Roja diyîne yê çalakî serê sodir bi pakîkerdişê dorme dest pêkerd.
CHP û OSP şi ziyaret
Temsîlkarê xeylê partî, rêxistin û saziyê civaka sivîl şî zîyaretê HDPyijan. Nê zîyaretan ra yewî hetê CHP ra virazîya. Parlamenter, endam û îdarekarê CHP yê Stenbolî HDPyijan ziyaret kerdî û desteg day ci. Mîyanê heyetê CHP de parlamenterê CHP yê Stenbolî Sezgîn Tanrikûlû, Hemserokê CHP yê Stenbolî Cemal Canpolat û Serokê CHP yê qezayanê Stenbolî ca girot.
Serokê Pêroyî yê Partîya Azadî û sosyalîzmê (OSP) Sînan Çîftyurek zî bi heyetekê şi zîyaretê Nobeta Wijdan û Edaletî û abluqaya polîsan rê nêrazîbîyayîş damûsna. Çîftyurekî veng da her kesî ke dormeyê kurdan de bibê yew. Seba HDP yew desteg zî muslumananê antî-kapîtalîstî ra ame. Îlahîyatnas û nuştox Îhsan Elîaçikî ke bi panqarta “Homa edaletî ferz keno” desteg da parlamenteranê HDP, hayr ant ablûqaya polîsan ser û vist vîrî ke HDP rê xurtîye yena kerdiş.
Platformê Komeleyê Herêmê yê Demokratîk zî HDPyijan zîyaret kerdî. Şêligo ke waşt Meydanê Kalkedon ra heta Parqa Yogûrtçû bimeşê rastê hêrîşa polîsan amê.
Sancar: Ma dê vernîya faşîzmî bigîrê
Parlamenterê HDP yê Mêrdînî Mîthat Sancar ke Nobeta Wijdan û Edaletî de qisey kerd û vist vîrî ke Tirkîya de edalet bi temamî têk şîya. Sancarî va hinî îronîyêka sîya û tarî ya ke mordem qala edaletî bikero. Sancarî da zanayîş ke xisûsîyetê esasî yê sîstemanê otorîter; zext, qedexe û zilm o.
Sûcanê xo ra tersenê
Mîthat Sancarî waşt ke her kes eleqeyê xo açarno parqe û wina dewam kerd: “Bi hezaran polîsan bi barîqatan dormeyê ci giroto. Çi ra tersenê? Sûcê xo, nêheqîyê ke kerdî, nêrindiyê ke kerdî xeylê vêşî yê. Zanê ke do hesab bîro persayîş. Ma dê no hesabî pers bikerê. Ma dê bi pêro quwetanê ke demokrasî ra emel kenê, hereket bikerê. ”
Sancarî tewr peynî de va: “Rastî vera zûrîyan, edalet vera zilm û talanî, wijdan vera nêrindî. Pêro dostê ma yê girotxane de vera zilmî xover danê, pêro embazê ma yê her ca de vera zilmî vejyenê; ma dê biresê pê û bi na meşa xo ya bi cesaret vernîya faşîzmî bigîrê.”
STENBOL