Nobeta Edalet û Wijdanî yê HDP vizêr zî Stenbol de kombîyayîşê koma HDP ra dima dest pêkerd. Hemseroka Pêroyî yê HDP Serpîl Kemalbay û 12 wekîlanê HDP seba ke tewrê nobeta parqî bibê banê HDP yê Kadikoy ra dest pê meşî kerdî û rixmê pêrokîn manîkerdişan meşîyay.
Verîya ke çalakvanî biresê parqe mavêna heyeta HDP û polîsan de gengeşî vejîya. Gengeşî ra dima polîsan barîqatan hewaday û şêligî dest pê meşî kerd. Dima ra dekewtişê parqe de şêlig hetê polîsan amê vindernayen. Şêligî bê mavên sloganê “Heq, huqûq û edalet” berz kerdî.
Nêrazîbîyayîşê medya da
Parlementerê HDP yê Anqara Sirri Sureyya Onderî xîtabê şêligo ke ver meydanê parqî de ame manîkerdiş kerd, ablûqaya polîsan rê nêrazîbîyayîş damûsna. Onderî vist vîrî ke medyaya hukmatî hewl dana ke Nobeta Edalet û Wijdanî bêîtîbar bikero. Onderî va, “Ma dê Nobeta Edalet û Wijdanî zey vewrêsî gird bikerê û da zanayîş ke iyê dê waştena aşitî û demokrasî de israr bikerê.
Kemalbay: Bêrê ma pîya faşîzmî têk biberê
Hemseroka Pêroyî yê HDP Serpîl Kemalbay, parlementer Fîlîz Kerestecîoglû, Sirri Sureyya Onder, Nadîr Yildirim, Mîthat Sancar, Hîşyar Ozsoy, Ayşe Acar Başaran, Bedran Ozturk, Erdal Ataş, Leyla Bîrlîk, Sîbel Yîgîtalp, Erol Dora û Îbrahîm Ayhan ke resyay Parqa Yogûrtçû, bin ablûqaya polîsan de kombîyayîşê xo yê kome viraştî. Xêlê partî sazîyanê zey HDK, EMEP, ESP, EHP, OHP, SYKP, KESK, DÎSK, TMMOB, TTB zî tewrê kombîyayîşî bî.
Hemseroka Pêroyî yê HDP Serpîl Kemalbay ke kombîyayîşî de qisey kerd û hayr ant polîtîkayanê qedexekerdişî yê hukmat ser. Kemalbay vist vîrî ke yê ke wazenê kilît naro ser parlamentoyî hewl danê ke kilît naro kuçeyan zî. Kemalbay aşkere kerd ke 7ê Hezîran ra dima wazîya ke parlamento bêfûnksîyon veradê û veng da herkesî ke dûştê faşîzmî de bibê yewe.
Şima çira tersenê?
Serpîl Kemalbay hayr ant ablûqaya vera Nobeta Edalet û Wijdanî ser û persa “Şima çira tersenê? Şima çima pêhetameyîşê HDP û şarî ra hendayî tersenê” kerd. Kemalbay aşkere kerd ke hewldayîşê ke HDP krîmînalîze kenê veng ê û wina va: “Ma ra hendayî tersayîşê înan sûcanê AKP-Qesrî damûsneno. Na îqtîdar ancax êşkena bi zûrîyanê girdî ser payan de vindero. Bi nîzamnameyê zerreyî ra pîya Meclîs açarnîya noterî.
‘Hêrîşê her kesî kenê’
Kemalbay vist vîrî ke hêrîşê pêrokîn kesê ke heqê xo geyrenê kenê û wina dewam kerd: “Heta ke ma faşîzmî bidê vindernayîş û heta ke xeyalê serbestî, aşitî û demokrasî yê şaranê Tirkîya bîrê ca, do têkoşînê ma dewam bikero.Çiqes ke têkoşîn bîro dayen, hendayî do demokrasî leze bîro. Kesî rê deynê ma yê mînetî çin o. Yê ke wazenê ma bi veyşanî terbîye bikerê, ma dê bi înan nanê xo bare bikerê.”
Kemalbay tewr peynî de va, “Ma dê zey Demirtaşî, zey Yuksekdag, zey Şik, Nurîye û Semîhî her cayî açarnê cayê têkoşînî.”
Kombîyayîşê komî ra dima Nobeta Edalet û Wijdanî ya 7 rojan dest pêkerd.
DÎHABER/STENBOL