Demanê peyênan de çeteyê DAIŞî hêrişê xo ser Tabura Kakeyî yê Daqoqî ke girêdayeyê Kerkukî yî, zêde kerdîy. Eynî wextî de verê cû çeteyan bi hêrişêkê sereyê di endamanê keyeyê kakeyî birnaybîy û 4 kesê bînan zî esîr girewtbîy.
Babete ser o Hetkarê Tabura Kakeyîyan Ferhad Nîzar û Pêşmergeyê kakeyî Erîf Macid û Cîhad Kerîmî qisey kerdî.
Nîzarî va ‘kakeyî goreyê welatîyanê bînan 2 reyan benî hedefê çeteyanê DAIŞî’û wina domna: “Sebebo yewin kakeyîbîyayîş o, ya dîyine zî wayîrê erdêko stratejîk î. Hetê ma de çemêko gird esto û nizdîyê tîya de newal û gelîyî zaf î. Çeteyê DAIŞî wazenî bi rayîrê hucreyanê xo yê nimiteyan dewanê kakeyîyan de welatîyan qetil bikerî. Eke ma heta Hewîce kontrol nêkerî, Kerkûk zî aram nêbeno. Badê ke Mûsil ame kontrolkerdiş, heme îdarekarê DAIŞî Hewîce de yî. Cok ra kontrolkerdişê Hewîce muhîm o.”
Ma fek erdê xo ra veranêdanî
Macidî zî va ‘DAIŞ zaf hêrişê ma keno û heme hêrişê înan ameyî vindarnayîş’ û wina dewam kerd: “DAIŞ zafaneyê hêrişanê xo şewe keno û hêrişê înan heta saeêk yan zî 2 saetan dewam kenî. DAIŞ wazeno kakeyîyan zî sey êzidîyan çinî bikero. Cok ra ma qet fek bawerîya xo ra veranêdanî û ma do bawerîya xo bipawî.”
Kerîmî zî dîyar kerd ke hewteyêk verê çeteyan çar hetan ra hêrişê ma kerdî, labelê ma hêrişanê înan têk berd û wina va: “Ma kurdê orijînal î û bawerîya ma cîya ya. DAIŞ wazeno bawerîya ma çinî bikero, labelê ma do bawerî û erdê xo bipawî. Ma hêrişanê çeteyan ra nêtersenîy.”
SORAN MIHEMED/KERKÛK/ROJNEWS