Qezaya Licê ya Amedî de mîyanê serrêka peyêne de bi desan reyan qedexeyê tebervejîyayîşî ameyî îlankerdiş û nê qedexeyan ver dewijî nizdîyê 2 aşman nêşînayî keyeyanê xo ra bivejyî.
Bitaybetî 20 rojê pêyênan de operayono ke bi beşdarbîyayîşê 10 hezar polîs, leşker û qoricîyan ver, rayîrê qeza de xendekî ameyî kinitiş û bi wesayîtanê zirxinan rayîrî ameyî padayîş. Heto bîn ra ame musayîş ke zaf hetanê qeza de seba viraştişê qereqolê neweyî dest pêkerdo. Her dewa ke ameya qedexekerdiş de nizdîyê 10 keyeyî estî. Seba ke hamnan ameyo, ganî dewijî heywananê xo bîşêrî merge û mehsûlanê xo kom bikerî, la destûr nêdîyeno. Her çiqas ke ame vatiş ke ‘qedexeyî peynî bîyî’ zî heta nika 2 dewî ameyî vengkerdiş. Qedexe ver şebekeyê telefonan yenî birnayîş û cok ra têkilî dewijan reyde birîyayo. Cinîyî babete ser o vanî ‘dewe de her game de leşkerî estî, ma nêşênî şêrî keyeyê cîranê xo û reaksîyon nîşan dayî.
Goreyê kêfê xo
Extîyarê ke dewan de manenî, dîyar kenî ke seba lazimîyanê muhîman daxî destûr nêdîyeno ke ê dewan ra bivejyî. Nêweş û extîyarî ancax bi destûrê fermandarê taburî eşkenî şêrî nêweşxaneyî. Reyna bombardimanan ver psîkolojîyê domanan xira bîyo. Welatîyêk babete ser o qisey kerd û wina va: “Qedexeyî goreyê fermandaran bedilîyenî. Nêweşî goreyê kêfê fermandaran erşawîyenî nêweşxane. Verê cû veşnayî, nika zî bombe kenî. Ma ra çi wazenî? Se beno wa bibo, ma do dewanê xo nêteriknî.”
ŞÛJIN/AMED