Cayê ke xebatê weçînayîşî tede yenî domnayîş ra yew zî Ewropa yo. Seke yeno zanayîş Koordînasyonê Weçînayîşî amebî awankerdiş û 26 welatê Ewropa û Japonya ra heta Kanada xeylê cayan de xebatê weçînayîşî yenî domnayîş. Babete ser o Hemserekê KCDK-Eye Yuksel Koço ke Koordînasyonê weçînayîşî de ca gêno, derheqê weçînayîşan de melumatî dayî. Koçî dîyar kerd ke ê bi hezaran kesan ber bi ber gêrenî û xebatan domenenî û wina va: “Heyecan û motîvasyonêk gird estî. Do Ewropa de rekor bêro şiknayîş.” Koçî va ‘xeylê merkezanê dinya de xebatî yenî domnayîş’ û wina dewam kerd: “Ma 26 welatê Ewropa, Kanada, Amerîka, Japonya, Avustralya û sewbîna xeylê cayan de xebatanê xo domnenî. 5 hezar 300 kesî komîsyonan de ca gênî. Ewropa de eleqeyêko gird HDP rê esto. Ma do Ewropa de 7ê Hezîrane derbaz bikerî. Ma şonî hetê weçînitoxanê AKP û CHPyî zî. Derbazkerdişê HDPyî yê bendê weçînayîşî zaf muhîm o. No weçînayîşêko normal nîyo. Ganî ma qerarê xo bidî, ka ma wazenî rejîmê dîktatorî reyde bicuyî an nê. Cok ra wa kurd, laz, çerkez, armenî, asurî, elewî, êzidî û muslumanî bibî yew. Eke ma hêzê xo bikerî yew, ma eşkenî birijnî Koçî dewamê qiseykerdişê xo de wina va: “Hêzê ma esto ke ma sîstemê Erdoganî birijnî. Wextê ma kêmî yo û ganî herkes sey namzed û Demîrtaşî bixebetîyo. Ganî tewr tay herkes 10 kesan rêxistine bikero. Wa herkes keyeyê xo bigêro. Ewropa de yê Çewlig, Serhed, Anatolîyaya Mîyanêne, Dêrsim, Mêrdîn, Botan ra estî. Eke ma hêzê xo bikerî yew, ma eşkenî zorê nê sîstemî bîşêrî.” ANF/KOLN