Amadekarîya weçînayîşê 24ê Hezîrane bêmabên dewam kena. Hemserekê Pêroyî yê HDPyî Sezaî Temellîyî derheqê weçînayîşan de bale ant ewleyîya sindoqan ser û wina va: “Sindoqî kura de benî wa bibî, ganî ma wayîr bivejyî. Ma do kayan xira bikerî û bendê weçînayîşî derbaz bikerî.”

Weçînayîşê 24ê Hezîrane rê 8 rojî mendî û her ke şono xebatê weçînayîşî ver bi peynîye şonî. Partîya Demokratîke ya Şaran (HDP) zî na çarçewa de lez dayo xebatanê xo û bajar bi bajar xebatê weçînayîşî domnena.

Hemserekê Pêroyî yê HDPyî Sezaî Temellîyî û namzeda HDPyî ya Îzmîrî Serpîl Kemalbaye derheqê xebatê weçînayîşî de qisey kerdî û melumatê muhîmî dayî. Temellîyî qiseykerdişê xo de qala ewleyîya sindoqan, hedefnîşandayîşê AKPyî, muhîmîya rayanê teberê welatî û sewbîna kerdî.

Temellîyî va ‘hesabê Erdoganî o yo ke HDP binê bendê weçînayîşî de biverdo’ û wina domna: “Eke HDP binê bendê weçînayîşî de bimano, tewr tay 80 parlamenterî derbazê AKPyî benî. Wina bibo, o wext AKP tura dîyine gêno binê temînatî. Cok ra seba ke ma binê bendî biverdî, çi destê înan ra bêro ê do bikerî. Operasyonê Qendîlî zî parçeyê na kaye ya. Nika wextê xirakerdişê na kaye ya. Erdogan ewro rasteyan de qala namzedîya Demîrtaşî keno. Talîmat dano YSKyî. Ewro hewl danî xebatanê ma asteng bikerî, reyna zaf cayan de hêrişê xebatkaranê ma kenî.”

Bibê muşahîdê HDPyî

Temellîyî va ‘sindoq kura de beno wa bibo, ma do wayîrê rayanê xo bivejyî’ û wina dewam kerd: “Ma do şêrî ray bidî û wayîrê îradeya xo bivejyî. Wa herkes bibo muşahîd, no zaf muhîm o. Ez bawer kena ke HDP do bendê weçînayîşî derbaz bikero. Nika rayê ma mabênê se ra 10.2 û 10.6î de yo. Ez tîya ra veng dana herkesî. Ma rayanê xo se ra 9. 99 bihesebnî û seke lazimîya ma bi yew raye esta, ganî ma wina bixebetyî. Ma zanî ke no bend tena vernîya HDPyî de nê, vernîya demokrasî û çareserîya problemê kurdî de zî esto. No îqtîdar zî bi zanayîş nê bendî vindarneno. Ê se bikerî zî şarê Tirkîya do nê bendî birijnî. Xora nika teberê welatî de rijnayîşê bendê weçînayîşî dest pêkerdo. Ma zî do na xebate temam bikerî. Ez veng dana şarê ma yê teberê welatî ke wa rayanê xo bixebetnî.”

Temellîyî peynîya qiseykerdişê xo de seba mîtînga Stenbolî ke do 17ê Hezîrane de bêro viraştiş veng da herkesî ke wa beşdarê mîtînge bibî.

Herkes wazeno kewa Erdogan şêro

Namzeda HDPyî ya Îzmîrî Serpîl Kemalbaye zî weçînayîşê 24ê Hezîrane ser o qisey kerde. Kemalbaye qala muhîmîya weçînayîşan kerde û wina va: “Hedefê ma o yo ke ma tewr tay 4 parlamenteran Îzmîr ra bivejî. Ma atmosferê weçînayîşî ver keyfweş î. Fehmo ke AKPyî awan kerdo û tesîrê ê fehmî êdî sey verênî nêmendo. Ziqaqan de welatîyê sey AKP û MHPyî nêfikirîyenî. Wexto ke ma şonî zîyaretê keyeyan, herkes qayîl o ke HDP meclîs de bibo. Şar qerardar o ke 24ê Hezîrane peynîya îqtîdarê Erdoganî bîyaro. Şar zaf baş zano ke çi reyde têrî yo.”

MERKEZÊ XEBERAN