Meclîsê Ciwananê HDPyî bi siloganê ‘Xo rêxistine bikere azade bibe, dagîrkerî parçe bikere’ dest bi kongreya xo ya 2. viraşte. Kongre Salona Geterlerî de ameye viraştene û bi hezaran ciwanî beşdarê kongre bîyî.
Dormeyê salone hetê polîsan ra girîyaye binê abluqayî û ciwanî badê ke hetê polîsan ra ameyî sehnayene, kewtî salone. Dezgehê sey SGDF, DEV-GUÇ, ESP, Partîya Şorişgêre, Yewîya Wendekaran ya Partîya Komunîste û endamê Yewîya Ciwanan zî destek da kongre.
Salone de pankartê ke ser o ‘Se beno wa bibo, peynî do zaf weş bibo’, ‘Bi ruhê cinîyanê ciwanan xo rêxistine bikere, tecrîd parçe bikere’, ‘Seba unîversîteya xoser û azade sere wedarne’ û sewbîna ameyî aliqnayene. Ciwanan bi deyîran govend girewt û silogananê ‘Bê Rayberî cuye nêbena’, ‘ma do bi xoverdayîşî qezenç bikerî’, ‘PKK şar o û şar tîya de yo’ eştî û tilîlî ancîyayî.
Eke yewîye bibîyêne qetlîyamî nêbîyêne
Kongre de Hemserekê Kongreya Komelê Demokratîke Berdan Ozturkî va ‘ma bi ciwanî dest pêkerd, ma do bi ciwanî serbikewî’ û bale ante yewîya neteweyî ser. Ozturkî va ‘vera dagîrkeran de kêmanîya ma yewîya neteweyî ya’ û wina domna: “Eke ma nêbî yewe, ma nêşênî vera dagîrkeran de bivinderî û ma do tim muhtacê înan bibî. Eke ma wina nêkerî, ma do nêşênbî hesabê ci bidî domananê xo. Zîlan, Dêrsim û Cizîr de qetlîyamî ameyî viraştene. Eke yewîye bibîyêne ewro wina nêbîyêne.”
AMED