Çend rojî verê yew Qerarnameyê Hukmê Qanûnî de (KHK) yo newe ame weşênayene û bi ê KHKyî rojnameyê Ozgurlukçu Demokrasî û rojnameyê Welatî zî ameyî padayene. Xora badê ke qayûm tayînê rojnameyê Ozgurlukçu Demokrasî û Çapxaneyê Gunî bîybî, rojnameyê Welatî zî weşanê xo yê kaxizkî dabî vindarnayene û dest bi weşanê dîjîtalî kerdî.
Babete ser o Wayîrê Îmtîyazî yê rojnameyê Welatî Zeynel Bulut û Derhênera Pêroyî ya Rojnameyî Elîf Can Alkane qisey kerdî. Bulutî dîyar kerd ke AKP seba ke kurdî bi ziwanê xo yê dayîke averşîyayîşan taqîb nêkerî, rojname pada û wina domna: “Vera nê şarî de bi hawayo fîzîkî dişmenî yeno kerdene û polîtîkaya qirkerdişî yeno domnayene. Rojnameyê ma polîtîkayê ke vera kurdan de yenî domnayene, deşîfre keno. Seba ke raştîyan tarîtîye de biverdî, rojname, ajans, televîzyon û radyo padayî.”
Bulutî dewamê qiseykerdişê xo de wina va: “Eleqeyêko gird yê şarê ma seba rojnameyî estbi. Ewro çi mekteb û çi zî akademîya ke şar bi ziwanê xo perwerde bivîno, çin o. Şar bi eleqeyêko gird wayîrê rojnameyî vejîyeno. Şarê ma wazeno ke wa rojname bêro weşênayene. Rojnameyê ma 202 rojî yo ke bi hawayo dîjîtal weşanê xo domneno.”
Weşanê ma do dewam bikero
Derhênera Pêroyî ya Rojnameyî Elîf Can Alkane zî wina va: “Herçiqas ke zehmetîyî zaf î zî, do rojnameyê ma weşanê xo bidomno. No oxir de bi desan embazê ma kewtî zîndan, canê xo dayî û surgun bîyî. Ma zî do heta ke şarê ma azade bibo, nê mîrasî bidomnî. Tena rojnameyêk estbî û o zî ame padayene. No zî nîşan dano ke vera ziwanê kurdî de tehamulê înan çin o. Wazenî vernîya resnayîşê raştîyan de bibî asteng.”
MA / AMED