Rojnamegere Seda Taşkine 20ê çileye 2017î de bi mehneya ‘derheqê to de îxbarêko cîddî esto’ ameybî tepiştene û dima ra serbest veradîyaybî. Labelê 22ê çileyî de reyna ameybî tepiştene û tewqîf bîybî. Tewr peynî 10ê teşrîna verêne de pêro pîya 7 serrî 6 aşmî ceza dîyaye aye. Rojnamegere Kîbrîye Evrene zî 9ê teşrîna verêne de tepişîyaye û dima ra tewqîf bîye.
Rojnamegeranê cinîyan vera zext û tedayê ke rojnamegerê cinîyan ser o estî de reaksîyon nîşan dayî. Rojnamegeran ra Gozde Çagriye va ‘ma rewşa Seda taqîb kenî’ û wina domnaye: “Ma rojnamegerîya Seda rê şahid î. Rojnamegerêk eşkena çimeyê xebera xo reyde pêvînayîşan bikero. No suc nîyo. Ma qeraro ke ameyo dayene, qebul nêkenî. Ma do hetê embaza xo de bibî.”
Muxabîra Evrensel û Ekmek ve Gulî Burcu Yildirime zî dîyar kerde ke aye Sedaye baş şinasnena û wina va: “Bi mehneya ke merdim pê huyeno, 7 serrî 6 aşmî ceza dîyaye Seda. Ez bawer kena ke ma do demêko nizdî de reyna pîya xeberan taqîb bikerî.”
Bingeyê ci yê huqûqî çin o
Muxabîra Ajansê Mezopotamya Dîren Yurtsevere zî va ‘cezaya ke dîyaya Seda, ti bingeyê ci yê huqûqî çin o’ û wina dewam kerde: “Ez na ceza ver şaş bîya. Çimkî dosyaya embaza ma de bêxera xeberan çîyêk çinêbî. Sey Sedaye bi desan embazê ma ameyî tepiştene. Kîbrîye Evrene zî bi no qeyde tewqîf bîye. Raştîya xo de şexsê nê embazan de rojnamegerîye yena hedef girewtene. Heta ke embazê ma azade benî, ma do bibî vengê înan.”
JINNEWS / ANQARA