Endama Meclîsê Ekolojî ya Amedî Çîlem Akkaya ard ziwan ke bi têgerayîşê hembar ma do viraştişê kalekol û bendawan bidîy vindarnayîş.
Endama Meclîsê Ekolojî ya Amedî Çîlem Akkaya vat ke hemverê nînan gêrayîşê ewil do Qotê Verçem ya Erxenî sero, ya dîyin Şikefteya Birkleynî ya Liceyî sero û gêrayîşê peynî zî do Gelîyê Godernêyî sero bêro viraştiş û meşîyayîşê înan do heta aşma elûle û teşrîneyî bidomyo.
Akkaya wina vat: “Bi nîşandayîşê dîrok ma wazenîy dîroka xo ganî bitepişîy. Finak ma semeda şikefteya Hilar ya Erxenî rê ma embazê ke girêdayî tiryakî reyde şîy. Dewa ke nêzdîya weyra ya de ma dewijan reyde werd hedre kerd û ma werd. Armancê ma no bi ke, ma dewijan reyde germîyek awan bikerîy.”
Qir kenîy
Akkaya ard ziwan ke armancê esil ya meşîyayîşî no yo ke, ma wazenîy no meşîyayîşan reyde xoza û dîroka Amedî nîşanê merdiman bidîy û vat: “Ma dîy ke bi viraştişê bendawî xoza yeno qetilkerdiş. Ma zî hemverê nê semeda ke bêveng nêmanîy 25’ê aşmî de do meşîyayîşê bivirazîy.”
Nebat zergun nebeno
Akkaya bal ant ser viraştişê bendawan û vat: “semeda ke gazê zinarî bivecîy lazimo ke hukmek gird bêro nîşandayîş. Semeda no hukmî zî bendaw virazenîy. Sere de Ewropa û Amerîka zaf cayanê dinyayî de vetişê gazê zinarî ameyo qedexekerdiş. La çi heyf ke welatêy averşîyeye semeda ke planêy xo yê dagirker pêk bîyarîy welatê ma weçînenîy. Yeno zanayîş ke, cayo ke gazê zinarî ameyo vetiş de no şeş serre yo ke ti nebat zergun nêbeno û rengê aye ca zî zerd o.”
Ma do wayîr bicevîy
Akkaya vat ke ey dijî viraştişê kalekol û bendaw î û wina domna: “Her çand ke ma mîyanê ravêreya çarekerdişî de bibî zî, dewlet viraştişê kalekolan domnena. Ma zî seyî Meclîsê Ekolojî ya Amedî do dîrok û xozayê xo rê wayîr bivecîy. Ma têgerayîşê hembar ya şarê xo reyde do nê bendaw û kalekolan bidîy vindarnayîş.”