Koordînasyonê Komeleyê Cinîyanê Kurdistanî (KJK) derheqê 9ê Teşrîna verêne yê roja destpêkerdişê Komploya Mîyanneteweyî de îzehetêko nuştekî da.

KJKyî îzehetê xo de dîyar kerd ke Komploya Mîyanneteweyî serra 20. de dewam kena û wina dewam kerd: "Komploya ke tarîxê merdimîye de komploya tewr hîra û bêwijdan a, 15ê Sibate ra dima prosesê Îmrali da destpêkerdiş. Rayber Apo 19 serrî yo ke vera sîstemê Îmrali de xoverdayîşêko gird nîşan dano. Ma xoverdayîşo ke 19 serrî yo dewam keno, silam kenî. Reyna ma embaz M.Halît Oral û şehîdê ma yê bînî ke vera Komploya Mîyanneteweyî de xoverdayîşêko tarîxî nîşan dayî, biminet yad kenî. Xoverdayîşê Rayberîye, gerîla û şarî hêzanê komplokaran veng veto.”

KJKyî dewamê îzehetê xo de vato 'proseso ke Rayber Apo Îmrali de derbaz kerd, hem hetê azadîya pêroyî de û hem zî hetê azadîya cinîye de bîyo sebebê averşîyayîşanê muhîman' û îzehet wina domîyayo: "Dişmenî waştî ke Rayberîye tasfîye bikerî û bi no hawa sosyalîzm û kurdîtî zî tasfîye bikerî. Labelê Rayberîye nê açarna eksê ci. Wina bî ke êdî nêşenî kurdan înkar bikerî û sosyalîzm zî xo newe ra awan kerd. Mîmarê nê heme prosesan Rayber Apo yo û Rayber Apo nînan prosesê Îmrali de kerdo.”


Heta şiknayîşê tecrîdî têkoşîn

KJKyî îzehetê xo de wina vato: "Ma cinîyî sey KJKyî Kombîyayîşo Pêroyî yê 8. de vera prosesê komplo de soz da. Ma vera komplo de qerarê destpêkerdişê hemleyêkî girewt. Hemleya ma bi sloganê 'Sondê ma yo; ma do sîstemê Îmrali parçe bikerî. Rayber Apo reyde azad bicuyî' qerardarîya xo nîşan daya. Ma plan kerdo ke 3 merheleyan de na hemleya xo bierzî dewre. Merheleya yewine do mabênê 9ê Teşrîna verêne û 25ê teşrîna peyêne de, merheleya dîyine 25ê teşrîna peyêne û 15ê Sibate de û merheleya hîrêyine zî do mabênê 15ê Sibate û 4ê Nîsane de bierzî dewre. Na hemle do heta ke sîstemê Îmrali bêro parçekerdiş, dewam bikero.”


Ma do dêsan parçe bikerî

KJKyî peynîya îzehetê xo de bale anto muhîmîya hîrakerdişê çalakîyan ser û wina vato: “Ma do sondê xo bi gamanê îdeolojîk, polîtîk, rêxistinî bikerî yewe û sîstemê Îmrali parçe bikerî. Êdî vera nê faşîzmo ke hetê AKPyî ra yeno meşnayîş de, sebrê ma cinîyan nêmendo. Ma heta nika deqayêk daxî Îmrali de mendişê Rayberîye qebul nêkerd û ma do qebul nêkerî zî. Cok ra seba parçekerdişê sîstemê Îmrali ma sond werdo. Ma reyna soz danî ke serra 20. ya Komploya Mîyanneteweyî de Rayberîya xo azad bikerî. Ma veng danî heme cinî, ciwan, welatperwer û hetanê demokratîkan ke wa têkoşînê xo hîra bikerî û dêsanê Îmrali parçe bikerî.” 


ANF/BRUKSEL