Çalakîya grevê vêşanî ya Nurîye Gulmene û Semîh Ozakçayî roja 162. de dewam kena. Vizêr waştişê xoverdakaran yê qayîtkerdoxî amebî qebulkerdiş.
Çalakîya piştîdayîşî ke seba Gulmene û Ozakçayî Caddeyê Yukselî yê Anqara de yenî kerdiş zî 280 rojan pey xo de verda. Çalakgerê ke hem seba piştîdayîşê Gulmene û Ozakça û hem zî seba ke tepîya biagêrî karê xo her çiqas ke hende astengîyî estbîy, reyna zî meşîyayîşê xo kerdî û îzehet dayî çapemenîye.
Çalakgerî vernîya Abîdeya Heqê Merdiman de ameyî têhet û waştî îzehetêk bidî çapemenîye. Çalakgeran pankartê ‘Wa Nurîye û Semîh tepîya biagêrî karê xo’ akerdî û slogananê ‘Nurîye û Semîh tena nîyî’, ‘Wa bicuyo xoverdayîşê grevê vêşanî’ eştî. Polîs hêrişê çalakgeran kerd û çalakgeran heta Ziqaqê Konurî dehf da.
Wa Dayîka Gulsume ra bitersî
Çalakîye de Sosyolog Velî Saçiliko ke destpêkê çalakîye ra nata mîyanê xoverdayîşî de ca gêno, wina va: “Ma 281 rojî yo ke tîya de vernîya Abîdeya Heqê Merdiman de xover danî. Ewro roja 162. ya grevê vêşanî yo. Mamoste Acunî û 2 embazanê ma yê bînan zî esîr girewtî. No welat de meşîyayîş û çalakî heqêko meşrû yo; labelê ewro bi hawayo kêfî yeno astengkerdiş. Kesê ke polê Dayîka Gulsume û yê mi şiknayî û bi rojan o ke îşkenceyê embazanê ma kenî, wa bizanî ke do rojêk heme hesab bidî. Dayîka Gulsume ra tersenî, wa bitersî zî. Ê danî dayîkan ro zî. Ma do rojêk kesê ke destê xo dergê dayîkan kenî ra hesab bipersî.”
Çalakgerî îzehetê çapemenîye ra dima seba ke destek bidî Acun Karadag û 2 kesê bînî ke ameybî tepiştiş û do sewqê dozgerî biameyêne kerdiş, şîyî edlîye.
DÎHABER/ANQARA