Hêriş û dagîrkerîya dewleta tirkî vera Başûrê Kurdistanî de dewam kena. Dewleta tirkî hewl dana herêmanê Xakurkê û Bradostî bêmerdim bikera û qezencanê kurdan hedef gêna. Gerîlayê Kurdistanî heta nika derbê girdî artêşa tirkî ro. Başûrijî zî vera dagîrkerîye de reaksîyon nîşan dayî û vatî ‘Ma do erdanê xo dagîrkeran ra bipawî’.
Dewleta tirkî vera Başûrê Kurdistanî de hêriş û dagîrkerîya xo domnena. Bitaybetî vera herêmanê Bradost û Xakurkê de dagîrkerîye yena kûr kerdene. Artêşa tirkî girê sînorî ser o hetê teknîk û leşkerî de estena xo zêdenaya.
Ame musayîş ke yewîyê taybetinî herême de bi hawayo cîya cîya ca gênî û hêga, bexçe û zozananê dewijan ser o xo niminenî. Artêşa tirkî hewl dana herême bêmerdim biverda. Netîceyê hêrişê dewleta tirkî yê heta nika de bi desan dewe, mezra û sewbîna ameyî hedef girewtene. Xeylê hêga û erazîyî wina bîyî ke êdî nêşênî bêrî bikar ardene. Dewijan ser o ajanî û qoricîtîye yenî ferzkerdiş.
Heto bîn de vera nê hêriş û dagîrkerîye de Barzanî û partîya ci PDK bêveng î û heta nika reaksîyonêk daxî nîşan nêdayî. Goreyê melumatanê gerîla û dewijan nê hêrişî bê xebera PDK û Barzanîyî nêşênî bibî û ame musayîş ke PDK û Barzanî do Hecî Beg de berê sînorî biakerî.
Qendîlî destûr nêdayo dagîrkeran
Başûrijî vera hêriş û dagîrkerîya artêşa tirkî de reaksîyon nîşan dayî û dîyar kerdî ke ê do erdanê xo nêteriknî. Rêbiwar Ehmed Birahîmî va ‘ma vera hêrişê dagîrkerîye yê dewleta tirkî de bivinderî’ û wina domna: “Nê hêrişê sifteyînî nîyî. Dewleta tirkî Newroze de 4 ciwananê dewa Baleyanî qetil kerdbî. Wazenî şarê herême bitersnî û biremnî. Qendîl cayêko normal nîyo û heta nika destûr nêdayo dagîrkeran.”
Dêhat Setretînî dîyar kerd ke ê hêrişê dagîrkerîye yê dewleta tirkî şermizar kenî û wina va: “Ma ancax bi yewîya neteweyî eşkenî hêrişan veng bivejî. Dewleta tirkî bi mehneya PKKyî bi serran o hêrişê Qendîlî kena û heta nika bi seyan cinî, doman û sîvîlî qetil kerdî. Keye, bexçe û hêgayî zirar vînenî. Se beno wa bibo, ma do erdê xo ra nêvejyî û vera hêrişan de têkoşîn bidî.”
Qendîl keyeyê ma yo
Rêbûwar Emînî qala vindetişê şarî kerd û wina va: “Ciwanê Qendîlî do qet destûr nêdî dagîrkerîye. Qendîl keyeyê ma yo û ma ciwanî sey çimê xo Qendîl ra ewnîyenî. Ma amade yî no oxir de canê xo bidî. Erdogan wazeno bi nê hêrişan şarê Başûrî bitersno. Qendîlijî erdê xo ser o yî. Eke dewleta tirkî wazena Qendîlî dagîr bikera, ma do cewab bidî aye.”
Feysel Xelatêyî zî va ‘nê polîtîkayê dewleta tirkî newe nîyî’ û wina domna: “Hertim bi tehdîtan dîyar keno ke ê do Qendîlî dagîr bikerî. Seba ke şar keyeyê xo ca verdo, nê tehdîtî yenî kerdiş. Vera na dagîrkerîye de ganî partîyê sîyasî yê Başûrî zî reaksîyon nîşan bidî.”
MERKEZÊ XEBERAN