Cinîyî zîhnîyetê camêrdî ra êdî vanê bes û seba azadîya xo taxan de têkoşîn danî. Cinîyê femînîstî 2016 aşma gulane de hereketêk bi nameyê ‘Femînîstê Keske’ awan kerdî. Cinîyê femînîstî eynî wext de awankerdişê Grûba Sîyasetê Keske de zî ca gênî.
Cinîyê ke Hereketê Femînîstê Keske de ca gênî qala awanbîyayîş, hedef û projeyanê xo kerdî.
Cinî û xoza yew a
Ayla Tokmake qiseykerdişê xo de wina va: “Hereketê Femînîstê Keske de 10 madeyê şorişgerî estî. Nê 10 madeyanê ma de herêmebîyayîş, demokrasî, azadî, aştî, ekonomîya keske, ekolojî, edaletê hewayî û femînîzm estî. Rewşa nikayîn de cinî û cinîyanê penaberan ser de zextî zêde bîyî. Ma nêeşkayî ke vera tacîz, tecawiz, îstîsmar û dejê cinîyan de bêveg bimanî. Ma xo cinîyan rê deyndar dîy. Cok ra zî ma Hereketê Femînîstê Keske awan kerd. Zîhnîyetê camêrdî cinî û xozaye qetil keno. Cinî bi xoza ra yew a û ma do heqê xoza û cinîyan bipawî.”
Gulnûr Aksope zî wina qisey kerde: “Ma her ca de zaf zehmetî antî la reyna zî ma têkoşînê xo ra fek veranêda. Ma qerarê xobîyayîş û femînîzmî da. Hedefê ma, çinkerdişê zîhnîyetê zayendperest û çinkerdişê nêseyyewbînîya komele ya. Ma tena hereketêko ekolojîk nîyî. Ma vera her tewir pelçiqnayîş û pelçiqbîyayîşî de vindenî. Hereketê ma azadî, aştî, demokrasî û komunîzmî pawena. Ma zanê ke şer tewr zaf tesîrê xo cinîyan ser de virazeno. Cok ra zî ma mîyanê têkoşînê winasî de ca gênî.”
ŞÛJIN / STENBOL