Rayberê Şarê Kurdî Abdullah Ocalan 15ê Sibata 1999î ra nata binê tecrîdêko giran de yo û 11ê Êlula 2016î ra nata ti xebere tira nîna girewtiş. Nê tecrîd û îzolasyonî ver kurdî etirîyenî û bi aşman o payan ser o yî û bi çalakîyanê cîya-cîyayan tecrîdî protesto kenî. Vizêr Komara Adigeyî ya ke girêdayeyê herêma Krasnodarî ya Rûsya ya de cinîyê kurdî vejîyayî raşteyan û tecrîdî protesto kerdî. Çalakîye de Endama Tevgerê Cinîyanê Kurdî Sînem Broyevaye qisey kerde û wina va: “Ma şîddetê dewleta tirkî yê teberê merdimîye şermizar kenî û ma do na rewşe qebul nêkerî. Heta ka ma xebere Ocalanî ra gênî, ma do çalakîya xo bidomnî.” Broyevaye dewamê îzehetê xo de bale ante weçînayîşanê 24ê Hezîrane ser û wina va: “Ganî kurdî bi tesilî şêrî sindoqan ser û rayanê xo bixebetnî. Dewleta tirkî ya faşîste û Erdogan hewl danî bi kayan şarê ma bixapênî. Labelê kurdî çi tersenî û çi zî do bixapyî. Heta ka Rayberê ci azade beno, do têkoşînê kurdan dewam bikero. Wa çeteyê Erdogan û Bahçelî baş bizanî ke kurdî êdî nînî kayanê înan. Ma do hesabê çîyê ke çeteyanê Erdoganî Kobanê, Efrîn û Kurdistan de kerdî, bipersî. Ma do cuyêka bê Rayberî qebul nêkerî û heta azadîye ma do hertim payan ser o bî.” ANF/ADIGEY