Ma do heta peynî têkoşîn bidî

1000 kesê ke tede akademîsyen, sîyasetmedar, hunermend, roşnvîr, nuştox, huqûqnas û sewbîna kesî estî, seba ke krîzê sîyasî yê Tirkîya rê çareserî xelq bikerî, Otelê Poîntî de ameyî têhet û îzehetêk dayî çapemenîye. Kombîyayîş Taksîmê Stenbolî de ame organîzekerdiş.Kombîyayîş de îqtîdarê AKPyî, polîtîkayê şerê Kurdistan, referandûm û refleksê muxalîfê Tirkîya ameyî munaqeşekerdiş.

 Hûmara muxalîfan referandûm de vejîya orte

Kaybaza Tîyatro Gulrîz Sururîye, rojnameger Ayşe Hure û Hunermend Zeynep Tanbaye qiseykerdişê xo de sebebê xo yê ke seba çi îmze eştî vilaweka aştîye vatî.Sururîye qiseykerdişê xo de wina va: “Referandûm de her çiqas ke neheqî û kayî ameyî kerdiş zî hûmara muxalîfan referandûm de vejîya orte. Netîceyê referandûmî mi zaf hîsin kerd. Ma tena merdim î û çîyêk ma dest de çin o. La destê rakîbanê ma de pere, hêz, îmkan û dewlete estî. Ez seba heme kesê ke yenê pelçiqnayîş tîya de ya.”

Ma do raştîyan bivejî orte

Hure zî qiseykerdişê xo de vatişê Noam Chomskyî ard vîr û wina va: “Mi seba yewbîyayîşê şaran îmze eşt vilaweka aştîye. Ma seba ke vajî ‘ma çok nêrona û ma payan ser de yî û ma do xo ver bidî’ tîya de yî. Ma heqdar î û talebê ma meşrû yî. Ma do cewab bidî îqtîdar.” Tanbaye zî wina va: “Tîya de kesê raştgir, çepgir, musluman, bêbawerî, bawer û sewbîna estî. Welatê ma de yê ke demokrasî, edalet û yewî wazenî, zaf î. Şert û mercî se benî wa bibî, bawerîya ma esta. Ma do têkoşîn bidî û raştîyan bivejî orte.”