Hemserekîya Konseyê Caardişî yê KCKyî derheqê hêrişê Mexmurî de îzehetêko nuştekî daye. KCKyî îzehetê xo de dîyar kerd ke dewleta tirk vera şarê kurdî de dişmenîya xo nîşan daye.
KCKyî îzehetê xo va ‘no hêriş vera hêzo ke şarê Mexmurî hêrişanê DAIŞî ra xelisna de virazîya’ û îzehet wina dewam kerdo: “No hêrişî ra Miletê Yewbîyaye û hukmatê Iraqî berpirsîyar î. Çimkî warê hewayî yê Iraqî binê kontrolê dewleta Iraqî û hêzê koalîsyonî de yî. Ti hêz heta ke nînan ra destûr nêgo, nêşêno hêrişêko winasî bigîrî.”
KCKyî îzehetê xo de ardo ziwan ke ‘netîceyê hêrişan de 5 şerwanê pawitişî şehîd kewtî’ û wina dewam kerdo: “Ma keye û embazanê şehîdan rê û şarê Kurdistanî rê serweşî wazenî. Mexmur berê Başûrê Kurdistanî yo, hetta wexto ke DAIŞî hêrişê Hewlêr kerd, verê waşt tîya bigîro û dima ra Başûrê Kurdistanî dagîr bikero. Labelê o wext şarê Mexmurî bi mîlîs, ciwan û cinîyan vera hêrişan de xover da û hêrişan şikit. Nê xoverdayîşî ver Birêz Mesud Barzanîyî şîbî seba hêzê pawitişî sipasîyê xo kerdbî.”
Dewleta tirk dişmenê şarê kurdî yo
Dewamê îzehetê KCKyî de wina ameyo vatiş: “Verê nê hêrişî de heqê xoverdayîşî seba şarê kurdî meşrû yo. Şarê kurd do nîşanê dewleta tirkî bido ke do dewleta tirk wina bi hawayo asan nêşênbo hêrişê kurdan bikero. Do gonîya şehîdan erd de nêmano. Ganî kurdî bi hawayo baş bivînî ke dewleta tirk tena dişmenê Vakurê Kurdistanî nîya, dişmenê heme kurdan a. Hîna yewe aşme û nîme verê dewleta tirk nêvatêne ‘çi karê kurdan Kerkûk de esto, ez berê sînorî pada û kurdan vêşan verada’. Reyna na dewlete nêbîye, Asos de hêriş kerdêne. Ganî kurdî nînan bivînî û vera nînan de bivinderî.”
Ma do hesabê ci bipersî
KCKyî peynîya îzehetê xo de vato ‘no hêriş seke vera heme şarê kurdî de ameyo kerdiş o’ û wina qedêna: “Ma do hesabê nê hêrişî bipersî. Kampa Mexmurî kampa ke keyeyê şehîdî tede yî ya. Wa heme dinya na raştîye bizano ke Kampa Mexmurî tena nîya. Ma do hesabê nê hêrişî bipersî. Xeyalê şehîdan do pê bêro.”
ANF/BEHDÎNAN