DUYGU CÎNÎVÎZ/ AMED
Kongreya Komelê Demokratîke (KCD) şemeya vîyarteyî Amed de kongreya xo ya 8. bi şîyarê ‘Roje roja yewîya Kurdistanê azade ya’viraşte û qerarê muhîmî girewtî.
Hemsereka KCDyî Leyla Guvene derheqê kongre û xebatanê cinîyan de qisey kerde û melumatê muhîmî pare kerdî.
Hemsereka KCDyî Guvene va ‘Bitaybetî 15ê Temmuze teşebusê derbe ra dima bi vetişê Qerarnameyanê Hukmê Qanûnîyan (KHK) sazî û dezgeyê cinîyan hedef ameyî girewtiş û mîyanê nê sazî û dezgeyan de KJA zî estbîye’ û wina dewam kerde: “KJA ameye padayîş labelê cinîyan bi TJA xoverdayîşê xo domna. Cok ra mumkin nîyo ke vengê cinîyan bêro birnayîş. Çimkî êdî cinîye xo û komelî şinasnena. Cinîyî vera nê hêrişan de vengê cuyêka azade berz kenî û vera qetilbîyayîşê cinîyan de têkoşînê xo berz kenî. Kongreya ma zî no het de xebatanê xo domnena.”
Çîyêko keweno milê ma, ma do bikerî
Guvene dîyar kerde ke ê do sey KCD kampanyayê ke TJAye dayî destpêkerdiş de çîyêko bikewo milê înan ser, ê do bikerî û wina domnaye: “Ma do hewl bidî xo biresnî heme waranê cuye. Fabrîkayan ra heta hêgayan, ma do ber bi ber bigêrî û bi ruhêko kolektîf xebatanê xo bidomnî. Ma do bi no hawa hewl bidî rewşa cinîye hîna baş bikerî. Dayîkê aştîye seba nêyî bi serran o ke têkoşîn danî. Cinîyî bi serran o vernîya zîndanan de vindenî. Çimkî kêna û lajê înan seba ke nê sîstemî qebul nêkerdî, raştê hêrişan ameyî û erzîyayî zindanan.”
Ma do têkoşînê embazanê xo bidomnî
Guvene peynîya qiseykerdişê xo de wina va: “Zîndanî seba cinîyanê kurdan wayîrê cayêko muhîm o. Zîndanî her tim cuya cinîya kurdî de estbî, lablelê wexto ke Sakîne Casize Zîndanê Amedî de tuyê rîyê Esat Oktayî kerde, o wext têkoşînê cinîyan bedilîya. Cinîyê sey Bêrîtane, Zîlane, Arîn Mîrkane, Sêvê, Fatma, Pakîze, Asya û sewbîna xeylê cinîyê erjîyayeyî no têkoşîno rûmetin de têkoşîn dayî û bedelê giranî dayî, ma zî sey KCDyî do xeyalê înan pê bîyarî.”