Pêşnîyazê bedilnayîşê qanûno bingeyîyo ke Heyetê Pêroyî yê Meclîsî ra derbaz bî û pêşkêşê Serekkomar Erdoganî bî ver her ke şono îtîrazî zêde benî. Eke no pêşnîyaz bêro qebulkerdiş, xeylê selahîyatî dîyenî Serekkomarî û mehkemebîyayîşê Serekkomarî zî beno mucîze.
Rêxistinê cinîyan yê Îzmîrî derheqê referandûmî de qisey kerdî.
Verfeka Meclîsê Cinîyanê Sosyalîstan (SKM) ya Îzmîrî Berîtan Altune va ‘ma do zîhnîyeto tekperest yê camêrdî referandûm de birijnî’ û wina domnaye: “Her çiqas ke zext û tedayî zaf î, ma do reyna zî vajî nê. Ê zî zanî ke şar nêyî ra qayîl nîyo û nêyî ver etiryenî. Ma cinîyê sosyalîstî Tirkîya û Kurdistan de vajê nê. Ma zanî ke Sîstemê Serekî yeno manaya zêdebîyayîşê qirkerdiş û welato ke cinîyî nêeşkenî tede hilm bigirî. AKP wextê OHALî de hêzê cinîyan dî. Her çiqas ke qedexe û abluqa estbî zî cinîyan qet taxan nêteriknayî. Seba ke AKP vernîya Sîstemê Serekî de cinîyan sey asteng vîneno, ma zanî ke do derbeya sifteyîne bido cinîyan ro.”
Ma do teslîmê dîktatorî nêkerî
Endama Kolektîfê Cinîya Unîversîteyî Emîne Akbabaye zî va ‘AKPyo ke bi gonî û zulm îqtîdarê xo payan ser de tepişeno, nika bi dîktatorî wazeno îqtîdarê xo bigiro bin temînatî’ û wina dewam kerde: “No welatê ma yo û sewbîna ca çin o ke ma şêrî. Ma do welatê xo teslîmê dîktatorî nêkerî. Ma do vera dişmenanê cinîyan de heme cayan de wayîrê kede, beden, nasname û cuya xo ra wayîr bivejyî. Ma do unîversîteyan ra heta taxan heme cayan de ‘nê’yî rêxistine bikerî. Ma senî ke pêşnîyazê qanûnê îstîsmarî peyser da antiş, ma do nika zî taxe bi taxe vajî nê.”
ÎZMÎR