NAZIM DAŞTAN / MA / MINBIC
Bajarê Minbicî ke bin kontrolê Meclîsê Leşkerî yê Minbicî de yo, emser serrgêra 2. ya azadbîyayîşê xo pîroz keno, şerwanê ke azadkerdişê Minbicî de şehîd kewtî, yenî vîr ardene. Serrgêra 2. de mabênê şerwananê Meclîsê Leşkerî yê Minbicî û leşkeranê artêşa tirkî de Çemê Sacurî sey sînorî yeno zanayene. Labelê tehdîdê dewleta tirkî dewam kenî.
Ge-ge mesafeyo ke mabênê şerwan û leşkeran de esto heta 300 metre kêmî beno. Dewijê sînorî bin seyaya şerwanan de cuya xo domnenî. Dewijê ke xeta Ezaz ra heta Cerablusî yê ke wazenî biagêrî Vakurê Sûrîye rayîrî 24 akerde yenî verdayene. Mabênê şerwan û leşkeran de leşkerê Amerîka û Fransizî estî.
Fermandaranê Meclîsê Leşkerî yê Minbicî ra Şervan Dervîşî qala rewşa peyêne ya bajarî kerd. Dervîşî va ‘şarê Minbicî dejê girdî antî’ û wina domna: “Tehdîdê DAIŞî orte ra wedarîyayo, labelê zextê grûbanê Qalxanê Firatî dewam kenî. Heta ewro xeylê rayîrî ceribnayî. Labelê ma serrgêra 2. ya azadbîyayîşê bajarî de yî. Çîyê ke seba Minbicî yenî vatene raşt nîyî. Tirkîya û hêzê ke girêdayeyê ci yî, wazenî herême de têmîyanî bivejî. Labelê ma û şarê ma, ma do nêrî kayanê înan. Ma do hetê heme kesê ke DAIŞ ra derbe werdo de bibî. Ma bi wesîleya serrgêra azadîya bajarî, seba pîrozkerdişî xeylê hetan dawet kerdo. Ma bawer kenî ke serrgêra 2. ya azadîya bajarê ma heme şarê ma rê azadîye bîyaro.”