“Verdibistanan de krîtero tewr muhîm heskerdiş o. Ek ma çi bidî domanan ma aye çî domanan ra peyser gênê. Ek ma heskerdiş bidî înan, ma înan ra heskerdiş gênê. Lazim o ma sibarojê xo pê heskerdiş ronî.”
Şaredarî semedê hetkarîdayîşê komeleye, ekonomîk û esas de hetkarîdayîşê cenîyan, giranîya xo daya akerdişê krêşan. Şaredarî nika zî semedê ê krêşan perwerdekaran hedre kena. Şaredarî na wesîle ra semedê perwerdekaranê Zarokîstan û krêşan Semînerê Gure û Perwerdeyîya Musnayîşî organîze kerd.
Perwerdekarê Zarokîstanê Ben û Sen, Hasirli û krêşê 450 Banan û Bagcilarî beşdarê semînerî bîyê. 2 krêşê ê ke nika înşaat de yê teşrîna verên de yenê akerdiş.
600 hezar domanî estî
Semînerê perwerdeyî hewteyêk dewam keno. Qalîkerdişê akerdişî hetê Hemşaredara Şaristano Gird ya Amedî Gultan Kişanak ra virazîya. Kişanak ard ziwan ke Şaristanê Amed Şaristanêkê domanan o, 600 hezar domanî ke 17 serrî ra qij ê no şaristan de cuyenê û wina domna: “Domanê ke emrê înan mîyanê 3-6 serran de yo humara înan 100 hezar a. Ma behsê humarêka pîle kenê. Lazim o ma nê domanan cuyî rê hedre bike û semedê înan îmkanan peyda bike. No sebeb ra ma semedê domanan krêş û zarokîstanan akenê. Têkîlîya ke nê dibistanan de domanan dir yena ronayîş semedê demo ameyox zaf muhîm a.”
Hêz înan ra gênê
Kişanak qalîkerdişê xo de îzeh kerd ke perwerdeyîya verdibistanî de meseleya heskerdişî zaf muhîm a û wina domna: “Ma çi bidî domanan, ma aye çî gênê. Ek ma heskerdiş da domanan ma peyser înan ra heskerdiş gênê. Aye ra her çî domanî de dest pê keno. Aye ra ez her tim vana. Ek ma çi bide domanan ma do ameyoxî de înan ra aye çî bigêre.”
AMED