Ewro rojbîyayîşê Rayberê Şarê Kurdî Abdullah Ocalanî yo. Cinîyê ke dewa Amara de manenî, qala parekerdişê xo yê Ocalanî reyde kerdî û wina vatî: “Ganî tecrîd bêro wedarnayîş û ma azadîya Rayberîye wazenî. Ma do hertim pey Rayberîye û heqîqete de bibî.”
Rayberê Şarê Kurdî Abdullah Ocalan 4ê Nîsana 1949î de dewa Amara ya qezaya Xelfetî ya Riha de ameyo dinya û her serre rojbîyayîşê Ocalanî Amara de hetê bi hezaran ra yeno pîrozkerdiş. Emser serrgêra 69. ya rojbîyayîşê Ocalanî yeno pîrozkerdiş.
Babete ser o merdim û cinîyê ke dewa Amara de yî, qisey kerdî û qala parekerdişê xo yê bi Ocalanî kerdî. Cinîyan ra Gulsum Toygure va ‘ma domanîya xo ra nata Ocalanî reyde yewbînî şinasnenî’ û wina dewam kerde: “Dayîka Ocalanî Uveyş Ocalane xeylê zehmetîyî antî. Tesîrê dayîke Ocalanî ser o zaf estbi. Rayber Apo hertim bi hawayo cîya nizdîyê cinîyan bîyêne. Rayber Apo hertim bi hawayo rew zewejîyayîşê cinîyan muhakeme kerdêne. Ma saya ci de resayî nasnameyê xo. Rojê huzurinî ancax bi azadîya Ocalanî mumkin î.”
Gulsum Toygur
Hamdîye Goktaşe zî daye zanayîş ke ya her ke kitabanê Ocalanî wanena, hîna zaf ci ra tesîr bena û wina va: “Analîzê ke cinîyan ser o kerdî, mi de xeylê bedilnayîşî viraştî. Ez saya Ocalanî de xebatanê cinîyan de ca gêna.
Hamdîye Goktaş
Wexto ke Rayberîye de pêvînayîşî ameyênê viraştiş welat de hizûr estbi. Labelê wexto ke pêvînayîşî vindetî şer dest pêkerd. Eke wazenî vernîya şerî bigîrî, ganî berê Îmrali bêrî akerdiş û pêvînayîşî dest pêbikerî. Wa heme cinîyî seba azadîya Rayberîye rîyê xo tadî Amara û berpirsîyarîya xo bikerî.”
Azadîye nîşanê cinîyan da
Elîf Ocalan
Warezaya Ocalanî Elîf Ocalane zî wina va: “Reyna 4ê Nîsane yeno û herkes seba pîrozkerdişê rojbîyayîşî yeno tîya. Wexto ke ez 3 serre bîya, Rayberîye tîya ra şîye. Mi hertim kitab, rojname û televîzyon de ey dî. Ey hertim seba şarî Rayberîye kerdo, çimkî o wazeno ke wa şar azade bibo. Bitaybetî zî serekê cinîyan o. Rayberîye seba cinîyan zaf çîyî kerdî û rayîrê azadîye nîşanê cinîyan daye.”
Ma do astengîyan nasnêkerî
Waya Ocalanî Fatma Ocalane zî bale ante tecrîdo giran ke Ocalanî ser o esto ser û wina va: “3 serrî yo ke ma nêşênî pêvînayîşêk bikerî. Ganî tecrîd bêro wedarnayîş û pêvînayîşî dest pêbikerî. Tirkîya ancax bi no hawa kaos ra vejîyena. Ma azadîya şarê kurdî wazenî. Domanîya ma pîya derbaz bîye. Ey hertim heme çîyê xo embazanê xo reyde pare kerdêne. Bitaybetî zaf muhîmî dayêne cinîyan. Wexto ke cinîyî raştê teda ameyênê, zaf eciz bîyêne. Eke ewro cinîyî sere wedarnenî, no saya Ocalanî de yo. Her serre rojbîyayîş yeno pîrozkerdiş, labelê dewa ma girîyena abluqa. Labelê ma do astengîyan nasnêkerî û rojbîyayîşî pîroz bikerî. Ma wazenî wa tecrîd bêro wedarnayîş û ma do hertim pey Rayberîya xo û heqîqete de bibî. Ma bawer kenî ke emser wa bibo serra azadîya Ocalanî.”
JINNEWS / RIHA 
