Seke yeno zanayîş Tirkîya de ser rojnamegeran de zext û tedayî xeylê zêde yî û nika nizdîyê 180 rojnamegerî tewqîfkerde yî. Vizêr mehkemeyê tayê rojnamegeran estbî.
Mehkemeya yewine ya Mudurê Karê Nuşteyan yê Ozgur Gundemî Înan Kizilkaya û Wayîrê Îmtîyazî Kemal Sancili ke par ra tewqîfkerde yî, bîye. Doze ameye dîyayîş û netîceyê doze de her di rojnamegerî zî ameyî tehlîyekerdiş.
Mehkemeya bîne zî ya rojnameyê Cumhurîyetî bîye. Seba her di mehkemeyan bi seyan kesî vernîya Edlîyeya Stenbolî de ameyî têhet. Parlamenterê CHPyî Hîlmî Yarayici, Sezgîn Tanrikulu, Hemserekê SYKPyî Ahmet Kaya, Serekê Pêroyî yê DÎSK Basin-Îşî Faruk Erenî, Serekê Pêroyî yê TGSyî Gokhan Durmuşî û sewbîna bi seyan kesî beşdarê çalakîye bîyî. Çalakîye de fotografê rojnamegerê tewqîfbîyayeyan ameyî hewanayîş. Ser nameyê rojnamegeran rojnamegere Canan Yildize îzehet daye. Yildize va ‘wazenî huqûqî seba teslîmgirewtişî bixebetnî’ û wina dewam kerde: “Fek hêrişkerdişê heqîqetî ra verabidê. Lazimîya merdiman roşnî rê esta, tarîtîye rê nê.”Ganî rojnamegerî karê xo bikerî
Dima ra Serekê Internatîonalî IPI John Yearwoodî qisey kerd û wina va: “Ganî rojnamegerî tewqîfkerde nê, ser karê xo de bibî. Wa embazê ma bizanî ke ma tîya de yî.”Nuştox Gunter Wallrafî zî dîyar kerd ke bi emrê Erdoganî zext û tedayî zêde bîyî û wina va: “Ma embazanê xo yê rojnamegeran rê rêze gênî. Ê qehremanê nê donemî yî. Ez zaf hêvî nêkena labelê ez wazena ke heme rojnamegerî serbest bêrî veradayîş.”
Xoverdakaranê Yukselî ra Velî Saçilikî zî qisey kerd û wina va: “Anqara de wexto ke polîsî mudaxaleyê çalakîya ma kenî, ewil vera xo danî rojnamegeran. Cok ra lazimîya ma bi rojnamgeran esta. Ma do pîya qezenç bikerî.”
MA/STENBOL