Partîya Karkeranê Kurdistanî (PKK) 27ê Teşrîna peyêna 1978î de dewa Fîsî ke girêdayeyê qezaya Licê ya Amedî de kongreya xo ya awankerdişî viraştbî. Cok ra her serre 27ê Teşrîna peyêne sey roja awanbîyayîşê PKKyî yena pîrozkerdiş. Emser zî serrgêra 39. ya PKKyî ya. 

Babete ser o Înîsîyatîfê Şarê Demokratîkî yê Kurdistanî, Tevgerê Şorişî yê Yewbîyaye yê Şaran (HBDH), Komîteya Caardişî ya PKKyî, Koordînasyonê KJKyî û sewbîna xeylê dezgeyî îzehet dayî û serrgêra 39. ya awanbîyayîşê PKKyî pîroz kerdî. 

Destpêk de Înîsîyatîfî îzehetê xo de vato ke ‘Ma serra 40. ya PKKyî ke destpêk ra heta nika hertim bi xelqkerdiş, bi eştişê gamanê cesaretinan û xoverdayîşî dewam kerdo, pîroz kenî’ û îzehet wina dewam kerdo: “Ma sere de embaz Hakki Karer û heme embazê ke no oxir de şehîd kewtî bi minnet yad kenî û vera înan de vileyê xo çewt kenî. Ma Rayber Apoyo ke wexto ke hîna derheqê kurd û Kurdistanî de çîyêk çinêbî, bi vatişê ‘Kurdistan binê dagîrkerîye de yo’ dest pêkerd û partîye rona û her ke şî na partîye hîra kerd, bi rêzdarî silam kenî. Azadîya Rayber Apoyî, azadîya Kurdistanî û ya heme merdimîye ya. Cok ra ma soz danî ke têkoşînê xo gird bikerî.”


PKK sey tîje şaran ser de akerdo

Înîsîyatîfî îzehetê xo de bale anto vejîyayîşê PKKyî ser û wina vato: “PKK prosesanê tewr tarîyan de daxî sey tîje şaran ser o akerdo. PKK Mazlum Doganî reyde ‘bi xoverdayîşî serkewto’, bi Mehmet Tunçan reyde vera zulmî de sere nêronayo û bi Çîyageran zî ‘se beno wa bibo peynîya ci muteşem o’ bi xo yo. PKK bi Fermandare Gulnaz û Delalan nameyê ‘yê ke şer keno azade beno, yê ke azade beno rinde beno û yê ke rinde beno zî yeno heskerdiş’ o. Cok ra ganî heme şarê ma yo welatperwer dormeyê PKKyî de kom bibo û xo rêxistine bikero. Ma na çarçewa de serrgêra partîya xo sere de Rayber Apo û embazanê xoverdakaran û heme şarê xo rê pîroz kenî.” 


PKKyî biratîya şaran esas girewt

Heto bîn ra Tevgerê Şorişî yê Yewbîyaye yê Şaran (HBDH) zî mesajêk weşêna û serra 40. ya PKKyî pîroz kerd. HBDHyî mesajê xo de dîyar kerd ke PKK hertim vera faşîzmî de biratîya şaran esas girewto û wina dewam kerdo: “PKK bi hêzê xo yo leşkerî, sîyasî û komelkî Kurdistanî derbaz kerdo û bîyo partîyêka şorişgere ya herême. Vera hewldayîşê sîstemê kapîtalîstî ke wazeno Rojhelato Mîyanênî dagîr bikero û şarê ci esîr bikero de PKK rolêko tarîxî girewt ser milê xo. Wa serra 40. ya Awanbîyayîşê PKKyî heme şaran rê pîroz bo.”


Serra 40. serra serkewtişî ya

Komîteya Caardişî ya PKKyî zî serrgêra 39. ser o îzehetêk daye. PKKyî dîyar kerd ke ganî nêro vîrîkerdiş ke PKK tevgerê heyfgirewtiş û hesabperskerdişî yo û wina dewam kerdo: “Bi şehadetê Hakî Karerî partîye ronîyaye, bi şehadetê Mazlum, Kemal û Hayrîyan agêrayîşê ver bi welatî dest pêkerd, bi şehadetê Mahsum Korkmazî artêşa gerîlayan awan bîye, bi şehadetê Bêrîvane, Bêrîtane û Zîlanan şorişê azadîya cinîyan dest pêkerd. Ma bi ruhê heyfgirewtişî yê Sara, Nalîne, Azad, Baran û Delalan kewenî serra 40. Ma do bi nê ruhî faşîzmê AKP û MHPyî birijnî.  Ma na çarçewa de veng danî heme cinî û ciwanan ke wa beşdarê gerîla bibî û heyfê şehîdan bigîrî.” 


PKK destanêka ameya xelqkerdiş a

Koordînasyonê KJKyî zî derheqê serrgêra 39. ya awanbîyayîşê PKKyî de îzehetêk da. Kordînasyonî îzehetê xo de wina vato: “PKK destana ke bi kede û hewldayîşêko gird ameya awankerdiş a. Cok ra ma serrgêra 39. ya PKKyî sere de Rayber Apoyî rê, şarê ma yê welatperwer, cinî, ciwan, xoverdakaranê zînanan û heme şarê xo rê pîroz kenî.” 


NAVENDÊ XEBERAN