DÎLAN HEREKOL / ANF/BEHDÎNAN


Mîyanê 40 serran yê têkoşînê Tevgerê Azadîya Kurdî de bi hezaran şexsîyetê ke hetê fedakarî, qehremanî û kede de xo îspat kerdî, estî. Bitaybetî ewro kesê ke waye, bira, dayîke û pîyê înan beşdarê têkoşînê azadî bîyî, estî. Êdî wina bîyo ke merdim eynî mekan de raştê gerîlayê ke waye û bira, laj û kêna û sewbîna yenî.

Nînan ra yewe zî gerîla Stêrk Dîroka ke qezaya Farqînî ya Amedî ra ya. Keyeyê Stêrk Dîroke 6 waye û 3 birayan ra pê yena. Gerîla Stêrk Dîroke 2 serrî yo ke beşdarê gerîla bîya û wexto ke şehîd kewena, 2 wayê aye zî beşdar benî. Nê wayan ra Vîyan Stêrke hîna gerîla de ya. Na waye nameyê xo waya xo ya şehîde ra girewta. Êdî her 2 gerîlayî ser şopa waye û embazanê xo de meşîyenî. Gerîla Vîyan Dîroke (Asuman Mucele) 24ê Adara 2012î de qezaya Hawêlî ya Sêrtî de bi 14 embazanê xo yê cinîye reyde şehîd bîya. 

Gerîla Stêrk Dîroke derheqê waya xo ya şehîde de qisey kerde û vînayîşê xo arde ziwan.  Gerîla Stêrk Dîroke bale ante waştişê waya xo ser û wina va: “Wexto ke ma heywananê xo axurî ra vetêne, yan ez yan zî Vîyane seba pakkerdişê axurî şîyêne. Axur keyeyê ma ra 10 deqa dûrî de bî û seba şîyayîşê axurî ganî merdim cayêko ra berz veracêr bişîyêne. Şîyayîşê axurî ra ver kerrayêka girde ya sîya estbî û Vîyane tim şîyêne ewja û hetêkî kerraye hît kerdêne. Zerrîya xo ra çîyêk waştêne û aye kerraye girewtêne. Eke kişta hîte ya kerraye biameyêne destê aye, o wext bawer kerdêne ke waştişê aye yeno qebulkerdiş. Hema vaje zafane kişta hîte ameyêne destê aye. Xo bi xo vatêne ‘ez do beşdar biba’ û zaf kêfweş bîyêne. Aye roje zî şîye ewja û zerrîya xo de çîyêk waşte û kerraye girewte xo dest. Bi hawayo kêfweş agêraye û ma dest bi karê xo kerde. Ez aye kerraye qet xo vîra nêkena. Wexto ke waya mi beşdar bîye, ma şîyênê hetê aye zinarî. Kerraya waya mi her tim hetê mi de bîye. Wexto ke ez zî beşdar bîya, mi daybî dayîka xo. Ma êdî musaybî. Her ke ma şîyêne ewja ma kerraye hît kerdêne û zerrîya xo ra çîyêk waştêne. Bi raştî zî ma zaf tesîr bîybî” 


Rindîya aye nîno vîrîkerdiş

Gerîla Dîroke qala şehadetê waya xo Vîyane zî kerde û qiseykerdişê xo wina qedênaye: “Wexto ke cenazeya Vîyane ardî, dayîka mi waşte ke ma heme şêrî û cenazeya Vîyane bivînî. Ma şîyî û cenazeye ra ewnîyayî. Rindîyêka muazzame rîyê Vîyane de estbîye. Eke ez şaş nêba, 5 guleyî Vîyane ginaybî. Ez do rindîya Vîyane qet xo vîra nêkera. Ez çiqas qala Vîyane bikera, reyna zî do kemî bimano. Çîyo ke keweno para mi, wayîrvejîyayîşê vîrardişê aye û rayîrê aye de meşîyayîş o. Mi û waya mi ma sond werd ke ma do sîlehê Vîyane erd de nêverdî.”