GULÎSTAN TARA/BEHDÎNAN
Komelê Cinîyanê Kurdistanî (KJK) mabênê tarîxanê 2 û 6ê êlule de Warê Pawitişî yê Medya de Kombîyayîşê xo yo 8. viraşt û no kombîyayîş de qerarê muhîmî ameyî girewtiş.
Endama Koordînasyonê Partîya Azadîya Cinîyanê Kurdistanî (PAJK) Zêrîn Rukena ke beşdarê kombîyayîşî bîybî, derheqê munaqeşeyê ke ameyî kerdiş û qerarê ke ameyî girewtiş de qisey kerde.
Endama Koordînasyonê PAJKî Zêrîn Rukene daye zanayîş ke cinîyî demêko derg o ke çarçewaya sîstemê konfederalî de xo rêxistine kenî û winda dewam kerde: “Ma kombîyayîş de derheqê ‘konfederalîzmê cinîyan kamcîn dûştî de yo û seba cinî û şaran ma resayî kamcîn dûştî, problemê ma yê zîhnîyet û komelkî çî yî, weşî, ewleyî û azadîya Rayberîya ma û sey cinîyê PAJK û PKKyî ma do wezîfeyê xo yê rayberîye senî bîyarî ca’ de munaqeşe kerd û qerarê muhîmî girewtî.”
Qerarê muhîmî ameyî girewtiş
Rukene dewamê qiseykerdişê xo de dîyar kerde ke ê destpêk de derheqê azadîya Ocalanî de hedefê cîddîyî dayî vernîya xo û wina va: “Ma do vera sîstemê kapîtalîzmî de sîstemê modernîteya demokratîke awan bikerî. Linganê nê sîstemî ra yo tewr muhîm perwerde yo. Ma do bi perwerde sîstemê konfederalîzmî awan bikerî. Seba nêyî zî ganî Akademîyê Sîyasetî bibî. Her warê komelî de do xebatê hîna hîrayî bêrî kerdiş. Ekolojî ra heta ekonomîye, perwerde ra heta weşîye seba her merhale hedefî ameyî ronayîş. Ma do seba ke şorişê komelkî awan bikerî, vurîyayîşê kulturî esas bigîrî û seba nêyî xebate bikerî.”
Rolê cinîyanê PAJK û PKKyî
Rukene va ‘ganî her hetê cuye de xebatê berzkerdişê zanayîşî, kombîyayîşê agahdarkerdişî, perwerde û semînerî bêrî viraştiş’ û wina dewam kerde: “Ganî xebatê ke ma bikerî hîna şênber bibî. Kombîyayîş de ma hîna zaf ser sîstemê perwerde û xebatan de vindetî. Awankerdişê neteweya demokratîke de rayberîya cinîye esas a. Çimkî cinîyî komelê xo yo newe awan kenî. Yanî wexto ke nêyî kenî, azadîya xo zî awan kenî. Ma zanî ke awankerdişê zîhnîyetê demokratîke rehet nîyo. Cok ra ganî ma hîna zaf têkoşîn bidî. Seba nêyî konfederalîzma demokratîke muhîm a û rolê akademî û perwerdeyî gird o.”
‘Ma do nêmusî esaretîya Rayberîye’
Rukene dîyar kerde ke ê do esla tecrîdo ke Ocalanî ser de esto qebûl nêkerî û wina qedênaye: “Goreyê ma do neteweya demokratîke nê tecrîdî bişikna û Rayberîye azad bikera. Heta ke Rayberîye azade nêba, sazbîyayîş temam nêbeno. Cok ra awankerdişê neteweya demokratîke û konfederalîzmê demokratîke do azadîya Rayber Apoyî bîyaro. Ma heta nika esaretê Rayber Apoyî qebul nêkerdo û ma do qebul nêkerî zî. Cok ra kombîyayîş de şîyarê ‘Ma do tecrîdî bişiknî û faşîzmî birijnî’sey qerar ame girewtiş.”