Emser pîrozkerdişê 8ê Adare Roja Cinîyê Kedkarî yê Cîhanî vizêr Cizîr û Silopî de dest pêkerd. Pîrozkerdişî do heta roja 12ê Adare dewam bikerî. Hemsereka Pêroyî ya Partîya Herêman ya Demokratîke (DBP) Sebahat Tuncela ke Hepisxaneyê Sîlîvrî de tewqîfkerde (tepiştî) ya, seba 8ê Adare mesajêk erşawite.
Tuncele mesajê xo de aşkere kerd ke ‘seba ke vera cinîyan de hêrişê girdî estî, ê 8ê Adare hepisxaneyan de ravêrnenê’ û wina dewam kerd: “Ez cinîyê ke bi siloganê ‘cuyêka bîne mumkin o’ kewtî rayîr û seba ke edalet û aştîye awan bikerî têkoşîn û piştîdayîşêyewbînan gird kenî, bizerrî silam kena. Ma zaf waştêne ke Roja 8ê Adare Roja Cinîyê Kedkarî yê Cîhanî de şima reyde war û taxan de bibîyêne. Labelê seba ke vera sîyasetê ma yo demokratîk û têkoşînê ma de hêrişê girdî benî, ma na roje hepisxaneyan de derbaz kenî. Ma sey her wextî reyna 8ê Adare bi moral û coşêko gird derbaz kenî.”
Lazimîya destege
Tuncele dewamê qiseykerdişê xo de bale anta ser hêrişê ke vera cinîyan de benî ser û mesajê xo de wina vato: “Proseso ke polîtîkayê qetilkerdişî, şîddet û îstîsmarî cinîyan ser de yenî meşnayîş de hîna zaf lazimî bi piştîdayîşêyewbînan û berzkerdişê têkoşînî yê cinîyan esta. Ma cinîyî bi hawayo baş zanî ke seba cuyêka bîne ganî ma têkoşînê xo yê edalet, aştî, azadî û seyyewbînanî cinîyanê dinya reyde vera polîtîkayanê cînsîyetperestan de nîşan bidî û no çîyêko zaf muhîm o.”
Ganî ma bikerî
Tuncele peynîya mesajê xo de wina vato: “Vera nîjadperestî, cînsîyetperestî, dînperestî ke şarê ma ser de hêrişê girdî danî ferzkerdiş û cinîyî cuya komelkî ra teber kenî û keye de hepis kenî, reyna vera rijnayîş û faşîzmî de tena çîyo ke bêro kerdiş, rêxistinkerdişê xoverdayîşî yo. Bitaybetî bi hêrişê ke vera partîya ma de benî, bi hezaran sîyasetmedar, parlamenter, hemserekê şaredarîyan û hemserekê partîya ma ameyî tewqîfkerdiş de çîyo ke keweno milê ma ser de rêxistinekerdişê girdkerdişê têkoşînê azadî û xoverdayîşê cinîyan o. Ez bawer kena ke şima na berpirsîyarî bi hawayo baş anî ca. Ez Hepisxaneyê Sîlîvrî ra silam û heskerdişê xo seba heme cinîyê ke têkoşînê rêxistinkerde yê cinîyan erşawena û şexsê şima de roja heme cinîyê kedkaran yê cîhanî pîroz kena.”
ŞÛJIN / STENBOL