Yewna hetê nêy konsepta şerî no yo ke heta nika bi hezaran kesî çarçiweya nêy konseptî de ameyî tepiştiş û hîna zî tepişyenî. Babete sero Hemsereka DBPe ya Dîlokî Berîvan Ozpolat qalîkerd.
Dijî makeqanun o
Ozpolat dergeyîya qalîkerdişê xo de ciresna ke heremî de merdimî bi awayo zanaye yenî qetilkerdiş û wina vat: “Semedê nêy qetlîaman ti bingeya huqiqî zî çin a. Tîya de pîvanê seyyewbînanî ya makeqanune, yena îxlalkerdiş. Hetê nêyî de tepiştişê ke yenî kerdiş zî bi awayo kêfî yenî kerdiş û armancê nêy tepiştişan zî tersnayîşê şarî yo. Bi no hawa waştişê şarê ma yê tewr demokratîk nêveynenî û wazenî merdiman sero tersekî gird awan bikerî. Wina aseno ke hêrişî do vêşêr bibî.”
Sebebê hêrîşan
Ozpolat qalîkerdişê xo de bal ant ser serkewtişê partîya HDPe û wina verdewam kerd: “Ma do pawitişê waştişê şarê xo bidomnî. İsrarê ma hetê merdimbîyîş û demokratîkbîyîşî de yo. Nêy operasyonî bade 7’ê Hezîrane de dest pê kerd. Sebebê ci semedê ke partîya ma weçînayîşan ra bi awayo serkewte vejyaya, nêy hêrişî benî. Îqtîdarê AKPe bade weçînayîşan dijî xebatkaranê ma yê ke aktîf xebetyaynê, dest pê girewtişan kerd. Ti bingeya huqiqî ya nêy tepiştişan çin o.”
Ozpolat peynîya qalîkerdişê xo de wina vat: “Daraz hemverê êy ke înan ra nêbo, polîtîkaya çinîkerdişî meşnena. Daraz sey qazanê cazuy, êy ke hetê fikir de cîya yî, sey dişmen vînena û wazena înan werte ra wedarno. Daraz Qewlê Heqê Merdiman a Ewropaye ke Tirkîyaye zî hetgirê ci ya, bi no hawa sey çinî hesibnena. Operasyonê sîyasî goreyê ravêreyeya Tirkîyaye şekl gênî. Ma sey partîya DBPe hemverê operasyonanê sîyasî do rayvistbîyîşê xo hîna gird bikerî.”
PÎROZ ZIRIG / JINHA/DÎLOK