Hetê Îdareyê Ortaxîya Anonîmî ya Petrolê Tirkîya (TPAO) û Wezaretîya Enerjî ra do Petrolê Tirkîya (TP) bêro parçekerdiş û arizîkerdiş. Vera nê arizîkerdişî de 500 karkerê ke girêdayeyê Sendîkaya Petrol Îşî yê Mudurîya 4 herêman (Êlih, Trakya, Semsûr û Anqara) waştbî ke vernîya Wezaretîya Enerjî de çalakî bivirazî labelê na çalakî hetê Wezaretî ra bi mehneya ‘ewleyî’ de ameybî qedexekerdiş.
Serekê Sendîkaya Petrol Îşî yê Şûbeya Êlihî Şeyhmus Kaygusuzî babete ser o qisey kerd.
Kaygusuzî va ‘no arizîkerdiş do bêkarî zêde bikero’ û qiseykerdişê xo wina domna: “Wextêko winasî ke Êlih de ciwanî hende bêkarî mîyan de yî, no proje do hîna zaf zirar bido bajarî. Cok ra ma do heta peynî vera nêyî de têkoşîn bidî.”
Ma nêxebetîyenî
Kaygusuzî dewamê qiseykerdişê xo de va ‘pêvînayîşê ke ma bi îdareyê TPAO û Wezaretîya Enerjî viraşt, heta nika ma ti netîce ci ra nêgirewto’ û qiseykerdişê xo wina qedêna: “Ewro heme malzeme û ekîpmanê TPyî dewrê TPÎCî kenî û vanî ke do TPÎC şarî rê bêro akerdiş, labelê ti bingeyê ci yê huqûqî nêameyo awankerdiş. Ma wazenî ke wa TP nêro parçekerdiş. Kombîyayîşê ke ma embazanê xo yê karkeran reyde viraşt de vejîya orte ke ti embazê ma do teberê TPyî de sewbîna cayan de nêxebetîyo. Ma do seba domnayîşê têkoşînî cayêko ortax awan bikerî.”
DÎHABER / ÊLIH