Derheqê serrgêra qirbîyayîşê ermenîyan de Kongreya Şaran ya Mezopotamya (MHK) zî îzehetêko nuştekî da û bi îzehetê xo qirkerdişî protesto kerde.
MHKyî îzehetê xo de vato ‘102 serrî verê Împaratorîya Osmanî vera xirîstîyanê ke Anatolya û Mezopotamya de cuyayênê de qirkerdişêk viraşte’ û îzehet wina domîyayo: “Nê qirkerdişî ver 1 mîlyon û nîme ermenîyî, 500 hezar zî asûrî û suryanîyî ameyî qetilkerdiş. Bi sehezaran merdimî ya bîyî misilman yan zî mecbûr mendî ke vilayê heme cayanê dinya bibî. Îttîhat Terakkî, Teşkîlati Mahsusa û Alayê Hamîdîye ke nê qirkerdişî de ca girewtî, sucê merdimîye kerdî.”
Wa qirkerdiş bêro qebulkerdiş
MHKyî dewamê îzehetê xo de wina vato: “Zîhnîyeto ke 102 serrî verê qirkerdiş viraşt û zîhnîyetê ewroyên yê Komara Tirkîya eynî yo. Eke ewro Serekkomar yê ke misilman nîyî ra vano ‘gawur’, o wext tîya de problemêko gird esto. Reyna Serekkomar şarî ra vano ‘yew milet, yew welat, yew dewlet û yew ziwan’ û bi no hawa înkarî domneno. Roja ma ya ewroyêne de yê ke nê qirkerdişî amade kerdî û eştî pratîk, ewro vanî ‘hesaban ra’. Ma nê zîhnîyetî şermizar kenî. Wa rayapêroyî bizano heta ke no qirkerdiş bêro qebulkerdiş, ma do têkoşînê xo bidomnî.”
BRUKSEL